کسی تہذیبی خاتمے کی طرف نہیں بڑھ رہے : یورپ کا امریکہ کو جواب

یورپی ممالک نے اس امریکی دعوے کو سختی سے مسترد کر دیا ہے جس میں کہا گیا تھا کہ یورپ اپنی تہذیب کے خاتمے کے خطرے سے دوچار ہے۔

امریکی وزیر خارجہ مارکو روبیو نے گزشتہ روز اپنے خطاب میں کہا تھا کہ واشنگٹن ٹرانس اٹلانٹک اتحاد کی ازسرِنو تشکیل اور اپنی پالیسی ترجیحات پر قائم ہے، جس میں کہا گیا کہ یورپ کا معاشی جمود تہذیب کے خاتمے کے سنگین خطرے کے مقابلے میں معمولی دکھائی دیتا ہے۔

امریکی مؤقف کے مطابق امیگریشن پالیسیوں، کم ہوتی شرحِ پیدائش، آزادیِ اظہار پر عائد پابندیوں اور قومی شناخت کے کمزور ہونے جیسے عوامل یورپ کو کمزور بنا رہے ہیں۔

امریکی بیان کے جواب میں یورپی یونین کی خارجہ امور کی سربراہ کایا کالاس نے ان الزامات کو مسترد کرتے ہوئے کہا کہ کچھ لوگوں کے دعووں کے برخلاف یورپ کسی تہذیبی خاتمے کی طرف نہیں بڑھ رہا۔

ان کا کہنا تھا کہ آج بھی متعدد ممالک اور عوام یورپی یونین کا حصہ بننے کی خواہش رکھتے ہیں، جو اس بات کا ثبوت ہے کہ یورپ کی کشش اور اس کی اقدار اب بھی مضبوط ہیں۔

انہوں نے بتایا کہ گزشتہ برس کینیڈا کے دورے کے دوران انہیں آگاہ کیا گیا کہ وہاں بھی بڑی تعداد میں لوگ یورپی یونین میں شمولیت میں دلچسپی رکھتے ہیں۔

انہوں نے یورپ پر کی جانے والی تنقید کو بلاجواز قرار دیتے ہوئے کہا کہ یورپی یونین انسانی حقوق، جمہوری اقدار اور انسانی فلاح و بہبود کے فروغ کے لیے مسلسل کام کر رہی ہے، اور یہی عوامل براہِ راست خوشحالی اور استحکام کا باعث بنتے ہیں۔ یورپ کی بنیادیں مضبوط ہیں اور اسے کمزور ثابت کرنے کی کوششیں حقیقت کی عکاسی نہیں کرتیں۔