بھارت کی جانب سے ضبط کئے گئے تیل بردار جہاز ایرانی نہیں : حکام

بھارت کی جانب سے سمندر میں ضبط کیے گئے تین تیل بردار جہازوں کے معاملے پر ایران نے واضح کیا ہے کہ ان جہازوں کا ایران یا اس کی سرکاری تیل کمپنی سے کوئی تعلق نہیں۔

ایران کی قومی تیل کمپنی نے ان خبروں کو بے بنیاد قرار دیتے ہوئے کہا کہ انہیں ایران کے مبینہ پابندی زدہ تیل نیٹ ورک سے جوڑنا درست نہیں۔ بھارتی ذرائع ابلاغ میں پیر کے روز یہ خبریں سامنے آئیں کہ بھارت نے اس ماہ امریکی پابندیوں کا سامنا کرنے والے تین ایرانی تیل بردار جہاز قبضے میں لیے ہیں۔

بھارتی ساحلی محافظ دستے نے اپنے سمندری علاقوں میں چوبیس گھنٹے نگرانی کے لیے درجنوں جہاز اور متعدد طیارے تعینات کر دیے ہیں تاکہ کسی بھی مشتبہ نقل و حرکت پر فوری کارروائی کی جا سکے۔

ضبط کیے گئے جہازوں کے نام اسٹیلا روبی، اسفالٹ اسٹار اور الجافزیا بتائے گئے ہیں۔ ذرائع کے مطابق ان جہازوں نے قانون نافذ کرنے والے اداروں سے بچنے کے لیے بار بار اپنی شناخت اور جھنڈے تبدیل کیے، جن کے مالکان بیرون ملک مقیم ہیں۔

تہران نے ایک بار پھر اس الزام کو مسترد کیا ہے کہ اس کی سرکاری تیل کمپنی پابندیوں سے بچنے کے لیے کسی خفیہ بحری نیٹ ورک کا حصہ ہے۔ ایرانی مؤقف ہے کہ ایسے دعوے سیاسی دباؤ کا نتیجہ ہیں اور ان کا حقیقت سے کوئی تعلق نہیں۔