صدر ٹرمپ کے ٹیرف پلان پر یورپی یونین کا سخت احتجاج، معاہدے کی پاسداری کا مطالبہ

یورپی یونین نے امریکی صدر ڈونلڈ ٹرمپ کی جانب سے تجارتی محصولات میں غیر متوقع اضافے کے اعلان پر اپنے شدید ردعمل کا اظہار کیا ہے۔

یورپی یونین کے ترجمان نے ایک سرکاری بیان میں واضح کیا ہے کہ امریکی سپریم کورٹ کے فیصلے کے بعد محصولات میں کسی بھی قسم کا اضافہ قابل قبول نہیں ہے۔

ترجمان کا کہنا تھا کہ امریکا کو چاہیے کہ وہ گزشتہ سال طے پانے والے تجارتی معاہدے کی شرائط پر سختی سے قائم رہے۔ انہوں نے زور دیا کہ معاہدہ ایک قانونی اور اخلاقی عہد ہوتا ہے، اس لیے امریکی انتظامیہ کو عدالتی فیصلے کے تناظر میں اپنی پالیسی کو فوری طور پر واضح کرنا چاہیے۔

یہ بھی پڑھیں : امریکی صدر نے عالمی تجارتی محصولات میں پندرہ فیصد اضافہ کردیا

بیان میں مزید کہا گیا ہے کہ یورپی مصنوعات پر کسی بھی نئے ٹیرف کا اطلاق نہیں ہونا چاہیے کیونکہ اس طرح کے اچانک فیصلے عالمی منڈیوں میں بے یقینی اور عدم استحکام پیدا کرتے ہیں۔

یورپی یونین کے مطابق غیر متوقع محصولات نہ صرف کاروباری اعتماد کو ٹھیس پہنچاتے ہیں بلکہ بین الاقوامی تجارت کے بہاؤ میں بھی بڑی رکاوٹ بنتے ہیں۔

یاد رہے کہ امریکی صدر ڈونلڈ ٹرمپ نے سپریم کورٹ کے ایک فیصلے کا حوالہ دیتے ہوئے عالمی ٹیرف کو دس فیصد سے بڑھا کر پندرہ فیصد کرنے کا اعلان کر دیا ہے۔