ایران سے ٹکراؤ کی تیاری، اسرائیلی فوج کا اربوں اضافی فنڈز کا مطالبہ

اسرائیلی عوامی نشریاتی ادارہ کا کہنا ہے کہ اسرائیلی سیکیورٹی اداروں نے ایران کے خلاف ممکنہ جنگ کی تیاریوں کے پیش نظر اربوں شیکل کے اضافی فنڈز کی درخواست کی ہے۔

رپورٹ کے مطابق حالیہ دنوں میں اعلیٰ سیکیورٹی حکام اور وزارتِ خزانہ کے درمیان متعدد اجلاس منعقد ہوئے، جن میں ایران کے خلاف ممکنہ نئی فوجی مہم کے لیے اضافی وسائل مختص کرنے پر غور کیا گیا۔ یہ مجوزہ رقم سن 2026 کے سیکیورٹی بجٹ میں شامل نہیں تھی، جس کا مجموعی حجم ایک سو بارہ ارب شیکل بتایا جاتا ہے۔

یہ بھی پڑھیں : ایران، امریکہ کے ساتھ طویل جنگ کی تیاری کر رہا ہے

اسی تناظر میں اسرائیلی وزیرِ اعظم نیتن یاہو نے محدود سیکیورٹی اجلاس طلب کیا، جس میں سیکیورٹی اداروں کے سربراہان نے ایران کے ساتھ ممکنہ محاذ آرائی کی تیاریوں کا جائزہ پیش کیا۔

اتوار کے روز سیاسی و سیکیورٹی کابینہ نے تین گھنٹے سے زائد طویل اجلاس میں فوجی کشیدگی کے امکانات پر غور کیا۔ اسرائیلی ٹیلی وژن چینل 12 کے مطابق اسرائیلی قیادت جنیوا میں جمعرات کو ہونے والے جوہری مذاکرات کو ایران کے لیے آخری موقع تصور کر رہی ہے، جبکہ خطے میں تناؤ مسلسل بڑھ رہا ہے۔