امریکا چھوڑنے والوں کی تعداد ریکارڈ سطح پر پہنچ گئی! کیا وجہ ہے؟

امریکا میں بڑھتی مہنگائی اور طرزِ زندگی کے مسائل کی وجہ سے شہری اب اپنے ملک چھوڑ کر دیگر ممالک میں ہجرت کر رہے ہیں۔ یورپی ممالک کے آسان ویزا قوانین اور ٹیکس میں مراعات نے بھی امریکی شہریوں کے لیے بیرونِ ملک زندگی کو کشش بنا دیا ہے۔

دی وال اسٹریٹ جرنل کی رپورٹ کے مطابق امریکا میں سیاسی کشیدگی، اقتصادی دباؤ اور روزمرہ کے معیارِ زندگی کے مسائل نے شہریوں کی بڑی تعداد کو یورپ، ایشیا اور لاطینی امریکہ منتقل ہونے پر مجبور کر دیا ہے۔ اس رجحان کے باعث امریکا پہلی بار کئی دہائیوں بعد منفی خالص ہجرت کا سامنا کر رہا ہے۔

تاریخی طور پر امریکا تارکینِ وطن کی منزل رہا ہے، لیکن اب یہ ملک اپنے شہریوں کی بڑھتی بیرونِ ملک ہجرت کے سبب ایک نئے سماجی اور اقتصادی چیلنج سے گزر رہا ہے۔

رپورٹ کے مطابق 2025 میں اندازاً ڈیڑھ لاکھ امریکی شہری ملک چھوڑ گئے، جو صورتحال آخری بار عظیم کساد بازاری کے دوران دیکھی گئی تھی۔ اگرچہ حکومت نے غیر قانونی تارکین وطن کی بے دخلی اور ویزا پابندیوں کو اس رجحان کا حصہ قرار دیا، لیکن اصل وجہ یہ ہے کہ امریکی شہری خود رضاکارانہ طور پر دوسرے ممالک منتقل ہو رہے ہیں۔

ماہرین کا کہنا ہے کہ یہ رجحان نہ صرف امریکا کی معیشت بلکہ عالمی ہجرت کے رجحانات پر بھی اثر ڈال سکتا ہے۔