ایران کا ایف پندرہ گرانے کا دعویٰ، کویت نے متعدد امریکی طیاروں کی تباہی کی تصدیق کر دی

ایرانی میڈیا نے یہ دعویٰ کر کے عالمی سطح پر ہلچل مچا دی ہے کہ ایران کے دفاعی نظام نے امریکی فضائیہ کے ایک ایف 15 لڑاکا طیارے کو کامیابی سے نشانہ بنا کر مار گرایا ہے۔

ایرانی ذرائع ابلاغ کے مطابق یہ کارروائی اس وقت کی گئی جب امریکی طیاروں نے ایران کی فضائی حدود کی صریح خلاف ورزی کی تھی۔ نشانہ بننے والے امریکی طیارے کا ملبہ پڑوسی ملک کویت کی حدود میں جا گرا ہے۔

دوسری جانب کویت کی وزارت دفاع نے اس واقعے کی تصدیق کرتے ہوئے کہا ہے کہ وہ امریکی افواج کے ساتھ مسلسل رابطے میں ہیں۔

کویتی حکام کے مطابق صرف ایک نہیں بلکہ امریکہ کے متعدد طیارے گرے ہیں اور وہ ان واقعات کی وجوہات جاننے کی کوشش کر رہے ہیں۔

یہ بھی پڑھیں : ایران سے پاکستانیوں کی واپسی کا سلسلہ شروع، درجنوں طلبہ اور سیاح وطن پہنچ گئے

کویتی وزارت دفاع نے بتایا کہ طیاروں کے تمام عملے کے ارکان اور پائلٹ محفوظ ہیں۔ کویتی حکام نے فوری طور پر تلاش اور بچاؤ کی کارروائیاں شروع کیں، جس کے نتیجے میں تمام عملے کو بحفاظت نکال کر طبی امداد کے لیے اسپتال منتقل کر دیا گیا ہے، جہاں ان کی حالت مستحکم بتائی جاتی ہے۔

کویتی حکام اس وقت امریکی حکام کے ساتھ مکمل ہم آہنگی کے ساتھ کام کر رہے ہیں تاکہ حادثے کی اصل وجوہات کا تعین کیا جا سکے۔

اگرچہ ایرانی میڈیا اسے اپنی دفاعی کارروائی قرار دے رہا ہے، تاہم کویتی اور امریکی ماہرین اس بات کی تحقیقات کر رہے ہیں کہ آیا یہ کوئی تکنیکی خرابی تھی یا اسے واقعی نشانہ بنایا گیا ہے۔

اس وقت جائے وقوعہ سے ملبہ اکٹھا کرنے اور دیگر شواہد جمع کرنے کا عمل جاری ہے تاکہ کسی حتمی نتیجے پر پہنچا جا سکے۔