کردستان ایران کیخلاف جنگ کا حصہ نہیں بنے گا، کرد رہنماء کی عباس عراقچی کو یقین دہانی

عراقی کردستان کے صدر اور ایرانی وزیر خارجہ نے ایک ٹیلیفونک گفتگو کے دوران اتفاق کیا ہے کہ وہ خطے میں کسی تیسرے فریق کو صورتحال سے فائدہ اٹھانے کی اجازت نہیں دیں گے۔

عراقی کردستان کے صدر نیچروان بارزانی اور ایرانی وزیر خارجہ عباس عراقچی کے درمیان ایک اہم رابطہ ہوا ہے۔ یہ رابطہ ان رپورٹس کے بعد سامنے آیا ہے، جن میں دعویٰ کیا گیا تھا کہ امریکی خفیہ ایجنسی سی آئی اے ایرانی کردوں کو مسلح کر رہی ہے تاکہ ایران کے اندر بدامنی پھیلائی جا سکے۔

کرد صدر نے ایرانی حکام کو یقین دلایا ہے کہ کردستان کا علاقہ ان تنازعات کا حصہ نہیں بنے گا اور اپنی سرزمین کو کسی دوسرے ملک کے خلاف استعمال کرنے کی اجازت نہیں دے گا۔

ایرانی وزیر خارجہ نے عراقی وزیر اعظم شیعہ السودانی اور دیگر کرد رہنماؤں سے بھی بات کی ہے تاکہ سرحدوں پر سکیورٹی کو یقینی بنایا جا سکے۔

یہ بھی پڑھیں : ایران میں کرد جنگجوؤں کے داخلے کی خبریں بے بنیاد قرار

تجزیہ کاروں کا کہنا ہے کہ عراقی کردستان کے رہنما ایران کو مشتعل کرنے کا خطرہ مول نہیں لینا چاہتے۔ اگرچہ وہ ایرانی کردوں کی جدوجہد کے ساتھ ہمدردی رکھتے ہیں، لیکن وہ اپنے اقتصادی اور سکیورٹی مفادات کو ترجیح دیں گے۔

ایران نے پہلے ہی واضح کر دیا ہے کہ وہ اس جنگ کو اپنی بقا کی جنگ سمجھتا ہے اور اگر کردستان سے کوئی مداخلت ہوئی تو وہ وہاں کے بنیادی ڈھانچے اور معیشت کو تباہ کرنے کی صلاحیت رکھتا ہے۔

اسی خوف کے پیش نظر کرد قیادت اب ایران کے ساتھ بھرپور تعاون کی یقین دہانی کروا رہی ہے تاکہ خطے کو مزید کسی بڑی تباہی سے بچایا جا سکے۔