تل ابیب میں تباہی کے مناظر؛ 100 میٹر نیچے سرنگیں بھی لرز گئیں، بھارتی صحافی کا انکشاف

اسرائیل کے شہر تل ابیب میں حالیہ میزائل حملوں کے بعد صورتحال انتہائی کشیدہ ہو گئی ہے۔ ایک بھارتی صحافی نے وہاں کے حالات بیان کرتے ہوئے کہا کہ شہر میں تباہی کے واضح مناظر دیکھے جا سکتے ہیں اور زیر زمین بنائی گئی سرنگیں بھی حملوں کے باعث لرز رہی ہیں۔

بھارتی صحافی کے مطابق تل ابیب میں بعض سرنگیں زمین سے تقریباً 100 میٹر نیچے موجود ہیں، تاہم میزائل حملوں کی شدت اتنی زیادہ تھی کہ ان سرنگوں میں بھی جھٹکے محسوس کیے گئے۔ انہوں نے کہا کہ حملوں کے بعد شہر میں خوف اور بے چینی کا ماحول پایا جاتا ہے۔

صحافی نے یہ بھی انکشاف کیا کہ اسرائیلی حکام نے میڈیا پر سخت پابندیاں عائد کر رکھی ہیں۔ لاشوں یا زخمیوں کی تصاویر لینے کی اجازت نہیں دی جا رہی۔ صحافیوں کو اسپتالوں میں داخل ہونے سے بھی روکا جا رہا ہے۔ اس کے علاوہ تباہ ہونے والی عمارتوں کی تصاویر اور ویڈیوز بنانے پر بھی پابندی عائد ہے۔

ان کا کہنا تھا کہ اسرائیلی ٹیکنالوجی کے بارے میں دنیا بھر میں بہت باتیں سنی تھیں، لیکن موجودہ صورتحال میں کئی دفاعی نظام مؤثر نظر نہیں آئے۔ انہوں نے بتایا کہ بعض اوقات میزائل الرٹ کا پیغام بھی نہیں ملتا اور حملہ اچانک ہو جاتا ہے، جس سے شہریوں کو شدید خطرات کا سامنا کرنا پڑتا ہے۔

بھارتی صحافی کے مطابق تل ابیب میں صورتحال ابھی بھی غیر یقینی ہے اور شہریوں میں خوف پایا جا رہا ہے۔ یاد رہے کہ یہ صحافی بھارتی وزیر اعظم کے دورہ اسرائیل کی کوریج کے لیے وہاں موجود تھے جب یہ واقعات پیش آئے۔