ایران میں موجود پاکستانیوں کیلئے اہم پیغام جاری

ایران میں تعینات پاکستان کے سفیر مدثر ٹیپو نے وہاں مقیم پاکستانی شہریوں کو اہم ہدایات جاری کرتے ہوئے کہا کہ ایران میں موجود تمام پاکستانی فوری طور پر پاکستانی سفارتخانے سے رابطہ کریں تاکہ ان کی واپسی کے انتظامات بہتر طریقے سے کیے جا سکیں۔

سفیر کے مطابق موجودہ صورتحال کے پیش نظر پاکستانی شہریوں کی وطن واپسی کے لیے اقدامات شروع کر دیے گئے ہیں۔ تاہم ٹرانسپورٹ، خاص طور پر بسوں کی محدود دستیابی کے باعث کچھ مشکلات کا سامنا ہے۔ اس کے باوجود حکومت اور سفارتخانہ مسلسل کوشش کر رہے ہیں کہ پاکستانیوں کو جلد از جلد محفوظ طریقے سے واپس لایا جا سکے۔

پاکستانی سفارتخانے نے ایران میں رہنے والے شہریوں سے تعاون کی اپیل کرتے ہوئے کہا کہ جو لوگ پاکستان واپس آنا چاہتے ہیں انہیں سب سے پہلے اپنی رجسٹریشن کروانی ہوگی۔ رجسٹریشن مکمل ہونے کے بعد ہی ان کے سفر اور نقل و حرکت کا باقاعدہ منصوبہ بنایا جائے گا۔

مدثر ٹیپو نے کہا کہ درست معلومات کے بغیر واپسی کے عمل کو منظم کرنا مشکل ہو جاتا ہے۔ اس لیے تمام پاکستانی شہری جلد از جلد سفارتخانے سے رابطہ کریں اور اپنی تفصیلات فراہم کریں۔ اس اقدام سے حکام کو اندازہ ہوگا کہ کتنے افراد واپسی کے خواہشمند ہیں اور ان کے لیے کتنی ٹرانسپورٹ درکار ہوگی۔

سفارتخانے نے بتایا کہ رجسٹرڈ شہریوں کو دستیاب بسوں کے ذریعے مرحلہ وار پاکستان بھیجا جائے گا۔ اس مقصد کے لیے متعلقہ اداروں کے ساتھ رابطہ بھی جاری ہے تاکہ سفر کو محفوظ اور منظم بنایا جا سکے۔