ایران کے قطر، بحرین، سعودی عرب اور متحدہ عرب امارات پر میزائل اور ڈرون حملے

قطر، بحرین، سعودی عرب اور متحدہ عرب امارات میں میزائل اور ڈرون حملوں کے مزید واقعات سامنے آئے ہیں، جس سے پورے خطے میں سکیورٹی خدشات بڑھ گئے ہیں۔

اطلاعات کے مطابق قطر کے دارالحکومت دوحہ کے آسمان پر ایرانی میزائلوں کو فضاء میں تباہ کیا گیا۔ مقامی وقت کے مطابق رات تقریباً تین بجے خطرے کی سطح بلند کی گئی اور کچھ ہی دیر بعد شہر کے اوپر متعدد زور دار دھماکوں کی آوازیں سنی گئیں۔

عینی شاہدین کے مطابق آسمان پر روشنی کی لکیریں اور دھوئیں کے بادل دیکھے گئے، جو میزائل دفاعی نظام کی کارروائی کے نتیجے میں پیدا ہوئے۔ حکام کے مطابق حملے کے دوران میزائلوں کو فضاء میں ہی تباہ کر دیا گیا، جس کے باعث بڑے جانی نقصان سے بچاؤ ممکن ہوا۔

اسی دوران بحرین کے علاقے سترہ میں ڈرون حملہ ہوا، جس کے نتیجے میں بتیس افراد زخمی ہو گئے۔ بحرینی سرکاری ذرائع کے مطابق زخمی ہونے والوں کو طبی امداد فراہم کی جا رہی ہے اور سکیورٹی ادارے صورتحال کا جائزہ لے رہے ہیں۔

یہ بھی پڑھیں : حملے جاری رہے تو سنگین نتائج ہوں گے، سعودی عرب نے ایران کو خبردار کردیا

سعودی عرب کی وزارت دفاع نے بھی تصدیق کی ہے کہ کئی ڈرون حملوں کو ناکام بنایا گیا۔ ان ڈرونز کا ہدف صحرائے ربع الخالی میں واقع شیبہ کے تیل کے میدان تھے جہاں روزانہ بڑی مقدار میں تیل پیدا کیا جاتا ہے۔

سعودی حکام کے مطابق دارالحکومت ریاض کے شمال میں بھی دو ڈرون مار گرائے گئے، جبکہ شہر کے سفارتی علاقے کی طرف آنے والے ایک مشتبہ میزائل کو بھی تباہ کر دیا گیا۔

متحدہ عرب امارات نے بھی بتایا ہے کہ فجیرہ کے علاقے میں ایک بڑا آتشزدگی کا واقعہ پیش آیا، جو ایک تباہ کیے گئے میزائل کے ملبے کے گرنے سے پیدا ہوا۔