آبنائے ہرمز میں بحری جہاز بھیجنے کا کوئی فیصلہ نہیں کیا، جاپان

جاپان کی وزیر اعظم نے واضح کیا ہے کہ حکومت نے اب تک آبنائے ہرمز میں تیل بردار جہازوں کی حفاظت کے لیے بحری جہاز بھیجنے کا کوئی فیصلہ نہیں کیا۔

جاپان کی وزیر اعظم سانی تاکائیچی نے پارلیمان کو بتایا ہے کہ حکومت نے آبنائے ہرمز میں تیل بردار جہازوں کی حفاظت کے لیے بحری جہاز بھیجنے کا تاحال کوئی فیصلہ نہیں کیا۔

ان کا کہنا تھا کہ جاپان اس صورتحال کا بغور جائزہ لے رہا ہے اور یہ دیکھا جا رہا ہے کہ ملک اپنے قانونی دائرہ کار کے اندر رہتے ہوئے کیا اقدامات کر سکتا ہے۔

یہ بھی پڑھیں : جنگ ختم ہونے کے بعد بھی آبنائے ہرمز کی بحالی میں مہینوں لگ سکتے ہیں، ماہرین

اطلاعات کے مطابق جاپانی وزیر اعظم جلد واشنگٹن کا دورہ کریں گی، جہاں ان کی امریکی صدر کے ساتھ ملاقات متوقع ہے۔ اس ملاقات میں خلیجی بحران سمیت دیگر اہم امور پر تبادلہ خیال کیا جائے گا۔

امریکی صدر ڈونلڈ ٹرمپ اتحادی ممالک سے مطالبہ کر رہے ہیں کہ وہ اس اہم سمندری راستے کو محفوظ بنانے کے لیے مشترکہ کارروائی میں شامل ہوں۔ آبنائے ہرمز دنیا کے تیل کی بڑی مقدار کی ترسیل کا راستہ ہے اور ایران نے جنگ کے دوران اس راستے پر سخت کنٹرول قائم کر دیا ہے۔