اسرائیل کی لبنان کے رہائشی علاقوں میں بمباری جاری، متعدد شہادتوں کی اطلاعات

اسرائیل نے لبنان کے رہائشی علاقوں بشمول بیروت کے نواحی علاقوں اور بشامون کو شدید بمباری کا نشانہ بنایا ہے، جس کے نتیجے میں شہریوں کی بڑی تعداد شہید ہو گئی۔

لبنان کے خلاف اسرائیلی جارحیت کا سلسلہ بدستور جاری ہے، جہاں قابض افواج نے شہری اور رہائشی علاقوں کو نشانہ بناتے ہوئے حملوں کا دائرہ وسیع کر دیا ہے۔

اسرائیلی جنگی طیاروں نے کوہ لبنان کے علاقے بشامون میں ایک رہائشی اپارٹمنٹ پر بمباری کی، جو گنجان آباد علاقوں میں حملوں کے پھیلاؤ کی عکاسی کرتا ہے۔

اس سے قبل حازمیہ کے علاقے میں بھی ایک اپارٹمنٹ کو نشانہ بنایا گیا تھا، جس میں لبنانی وزارت صحت کے مطابق ایک شہری شہید ہوا۔

یہ بھی پڑھیں : لبنان کے شہری علاقوں پر اسرائیلی حملے، چھ افراد شہید

بیروت کے جنوبی نواحی علاقوں ضاحیہ پر بھی کم از کم سات فضائی حملے ریکارڈ کئے گئے، جس سے شدید تباہی پھیلی۔

جنوبی لبنان کے دیگر علاقوں بشمول زفتہ، البرغلیہ اور صور میں راشدیہ کیمپ کے قریب ایک گیس اسٹیشن کو بھی نشانہ بنایا گیا ہے۔

سرکاری اعداد و شمار کے مطابق دو مارچ سے اب تک لبنان پر ہونے والی اسرائیلی جارحیت کے نتیجے میں ایک ہزار چوبیس لبنانی شہری اپنی جانوں سے ہاتھ دھو بیٹھے ہیں۔ اسرائیل کی جانب سے مسلسل گنجان آباد محلوں کو نشانہ بنانے سے انسانی المیہ جنم لے رہا ہے۔