اسپین کی نیشنلٹی حاصل کرنے کے خواہشمند پاکستانیوں کیلئے بڑی خوشخبری

پاکستانی حکومت نے اسپین میں موجود غیرقانونی پاکستانی تارکین وطن کے لیے ایک اہم فیصلہ کر لیا ہے۔

وفاقی وزیر داخلہ محسن نقوی اور وفاقی وزیر اوورسیز پاکستانیز سالک حسین کی زیرصدارت ہونے والے خصوصی اجلاس میں یہ فیصلہ کیا گیا کہ اسپین میں موجود تمام غیرقانونی پاکستانی تارکین وطن کو ایک ہفتے کے اندر اندر پاسپورٹ اور دیگر ضروری دستاویزات فراہم کی جائیں گی۔

اجلاس میں اسپین میں پاکستانی تارکین وطن کے لیے ریذیڈنٹ کارڈ کے حصول سے متعلق پیش رفت کا بھی جائزہ لیا گیا۔ فیصلہ کیا گیا کہ رجسٹریشن کے عمل سے پہلے تمام اہل پاکستانیوں کو قانونی حیثیت دینے کے لیے ضروری کاغذات جاری کیے جائیں گے۔ اس اسکیم سے تقریباً 15 ہزار پاکستانی مستفید ہوں گے۔

وزیر داخلہ محسن نقوی نے ہدایت کی کہ کسی بھی مجرم یا مطلوب شخص کو پاسپورٹ جاری نہ کیا جائے۔ انہوں نے اسپین میں پاکستانی سفارت خانے کو پاسپورٹ سیکشن کے لیے اضافی عملہ فوری فراہم کرنے کی بھی ہدایت دی۔

 وفاقی وزیر اوورسیز پاکستانیز سالک حسین نے اسپین میں مقیم پاکستانیوں کی بھرپور حمایت پر وزارت داخلہ کا شکریہ ادا کیا۔