سعودی عرب میں اقامہ اور لیبر قوانین کی خلاف ورزی کرنے والوں کے خلاف سخت کارروائی

سعودی عرب میں اقامہ اور لیبر قوانین کی خلاف ورزی کے خلاف بڑے پیمانے پر کارروائیاں تیز کر دی گئی ہیں۔

عرب میڈیا رپورٹس کے مطابق سعودی محکمہ پاسپورٹ (جوازات) نے گزشتہ ایک ماہ کے دوران ہزاروں کیسز نمٹائے ہیں۔ انتظامی کمیٹیوں نے اقامہ، لیبر اور سرحدی سیکیورٹی قوانین کی خلاف ورزی پر 15 ہزار 200 سے زائد فیصلے جاری کیے۔ اس کارروائی میں سعودی شہریوں کے ساتھ ساتھ غیر ملکی افراد بھی شامل ہیں۔

حکام کے مطابق قانون توڑنے والوں کے لیے سزائیں سخت رکھی گئی ہیں۔ ان میں قید، جرمانہ اور ملک بدری شامل ہے۔ ان اقدامات کا مقصد ملک میں قانون کی پاسداری کو یقینی بنانا ہے۔

سعودی حکام نے عوام کو بھی خبردار کیا ہے کہ وہ کسی غیر قانونی شخص کی مدد نہ کریں۔ ایسے افراد کو رہائش دینا، نوکری فراہم کرنا یا انہیں سفر کی سہولت دینا بھی جرم کے زمرے میں آتا ہے۔ اس پر بھی سخت سزا دی جا سکتی ہے۔

امیگریشن قوانین کے تحت غیر ملکی کارکن صرف اپنے کفیل کے ساتھ ہی کام کر سکتے ہیں۔ کسی دوسرے کے لیے کام کرنا قانون کی خلاف ورزی سمجھا جاتا ہے۔ اسی طرح سرحدی قوانین کی خلاف ورزی بھی سنگین جرم ہے جس پر فوری کارروائی کی جاتی ہے۔