ایران جنگ کا انجام کیا ہوگا؟ براہِ راست شامل نہ ہونے کے باوجود معاشی قیمت چکا رہے ہیں، آسٹریلوی وزیراعظم

آسٹریلوی وزیراعظم نے ایران جنگ کے حوالے سے تحفظات کا اظہار کرتے ہوئے کہا ہے کہ اس مہم کا اختتام واضح نہیں ہے، آسٹریلیا اس کے معاشی نتائج بھگت رہا ہے۔

آسٹریلیا کے وزیراعظم انتھونی البانیز نے نیشنل پریس کلب سے خطاب کرتے ہوئے ایران کے خلاف جاری فوجی کارروائی کے طویل مدتی نتائج پر گہری تشویش کا اظہار کیا ہے۔

انہوں نے کہا کہ اگرچہ آسٹریلیا اس مقصد کی حمایت کرتا ہے کہ ایران کو کبھی بھی جوہری ہتھیار حاصل نہیں کرنے چاہئیں، لیکن اب یہ واضح نہیں رہا کہ مزید کیا حاصل کیا جانا باقی ہے یا اس جنگ کا اختتامی نکتہ کیا ہوگا۔

یہ بھی پڑھیں : صدر ٹرمپ کے خطاب کے بعد عالمی منڈی میں تیل کی قیمتوں میں چار فیصد اضافہ

وزیراعظم البانیز نے انکشاف کیا کہ اس جنگ کے آغاز سے قبل آسٹریلیا سے کوئی مشورہ نہیں کیا گیا تھا۔ انہوں نے مطالبہ کیا کہ صورتحال میں فوری طور پر تناؤ کم کیا جائے اور جنگ کے خاتمے کے حوالے سے مزید وضاحت فراہم کی جائے۔

وزیراعظم نے اپنے ملک کے عوام کو خبردار کیا کہ آنے والے مہینے آسٹریلیا کے لیے آسان نہیں ہوں گے۔ انہوں نے واضح کیا کہ اگرچہ آسٹریلیا اس جنگ میں براہ راست شریک نہیں ہے، لیکن اس کے باوجود ہر آسٹریلوی شہری اس جنگ کی وجہ سے بڑھتی ہوئی قیمتوں اور مہنگائی کی صورت میں بھاری قیمت ادا کر رہا ہے۔

ان کا یہ بیان صدر ٹرمپ کے اس دعوے کے برعکس ہے کہ جنگ کے اثرات عارضی ہیں، کیونکہ آسٹریلوی قیادت کو خدشہ ہے کہ واضح حکمت عملی کی عدم موجودگی میں یہ بحران عالمی معیشت کو مزید نقصان پہنچا سکتا ہے۔