مذاکرات کیلئے مضبوط ٹیم پاکستان بھیجی ہے، ٹرمپ

واشنگٹن: امریکی صدر ڈونلڈ ٹرمپ نے پاکستان میں جاری سفارتی سرگرمیوں کو اہم قرار دیتے ہوئے بتایا کہ ایک مضبوط اور تجربہ کار ٹیم اسلام آباد بھیجی گئی ہے۔ اس ٹیم میں جے ڈی وینس، جیرڈ کشنر اور اسٹیو وٹکوف شامل ہیں، جو خطے کی موجودہ صورتحال پر بات چیت کریں گے۔

ایران کے معاملے پر بات کرتے ہوئے صدر نے واضح کیا کہ امریکا کا اصل مقصد حکومت کی تبدیلی نہیں بلکہ ایران کو ایٹمی ہتھیار حاصل کرنے سے روکنا ہے، اور اس حوالے سے امریکا انتہائی سنجیدہ ہے۔ ممکنہ معاہدے کو اسی شرط سے جوڑا جا رہا ہے کہ ایران کا جوہری پروگرام مکمل طور پر محدود کیا جائے تاکہ عالمی امن کو خطرہ نہ ہو۔

آبنائے ہرمز کے بارے میں بھی اہم بیان سامنے آیا، جس میں کہا گیا کہ یہ اہم سمندری راستہ جلد مکمل طور پر کھول دیا جائے گا۔ اگرچہ امریکا اس راستے کو زیادہ استعمال نہیں کرتا، لیکن عالمی تجارت کے لیے اس کی اہمیت برقرار ہے۔

امریکی صدر نے ایران کی فوجی صلاحیت پر بھی تبصرہ کیا اور دعویٰ کیا کہ اس کی طاقت میں واضح کمی آ چکی ہے، خاص طور پر میزائل بنانے کی صلاحیت متاثر ہوئی ہے۔ موجودہ صورتحال کے حوالے سے حتمی اندازہ مذاکرات کے نتائج کے بعد ہی ممکن ہوگا، کیونکہ آج کی بات چیت کو نہایت اہم قرار دیا جا رہا ہے اور عالمی سطح پر اس پر گہری نظر رکھی جا رہی ہے۔