مفت لیپ ٹاپ حاصل کرنے کے خواہشمند طلباء کیلئے بڑی خوشخبری آگئی

وزیراعلیٰ پنجاب کی جانب سے مفت لیپ ٹاپ اسکیم کے دوسرے مرحلے کا باقاعدہ آغاز کر دیا گیا ہے۔

 اس اسکیم کے تحت صوبے بھر کے طلبہ آن لائن درخواست دے سکتے ہیں اور جدید لیپ ٹاپ حاصل کرنے کا موقع پا سکتے ہیں۔ اس اقدام کا مقصد نوجوانوں کو جدید ٹیکنالوجی سے جوڑنا اور تعلیمی میدان میں ان کی مدد کرنا ہے۔

محکمہ ہائر ایجوکیشن کے مطابق صوبے کی تمام سرکاری جامعات اور چند منتخب نجی یونیورسٹیوں کے طلبہ اس اسکیم کے اہل ہیں۔ اسکیم کے آغاز کے پہلے ہی دن چار ہزار سے زائد درخواستیں موصول ہو چکی ہیں، جو اس بات کا ثبوت ہیں کہ طلبہ اس پروگرام میں بھرپور دلچسپی لے رہے ہیں۔

اسکیم کے تحت دیے جانے والے لیپ ٹاپ جدید خصوصیات سے لیس ہوں گے۔ ان میں 13ویں جنریشن کا انٹیل کور آئی سیون پروسیسر شامل ہوگا۔ تیز رفتار کارکردگی کے لیے ایس ایس ڈی اسٹوریج دی جائے گی، جبکہ بہتر ملٹی ٹاسکنگ کے لیے ہائی اسپیڈ ریم بھی موجود ہوگی۔ یہ لیپ ٹاپ تعلیمی سرگرمیوں کے ساتھ ساتھ ریسرچ اور آن لائن لرننگ میں بھی مددگار ثابت ہوں گے۔

درخواست دینے کے لیے چند شرائط بھی مقرر کی گئی ہیں۔ امیدوار کا پنجاب کا ڈومیسائل ہونا لازمی ہے۔ بی ایس پروگرام کے پہلے یا دوسرے سمسٹر میں زیرِ تعلیم طلبہ درخواست دے سکتے ہیں۔ اس کے علاوہ پبلک یونیورسٹیز، منتخب نجی جامعات، میڈیکل، ڈینٹل اور نرسنگ کالجز کے طلبہ بھی اس اسکیم کا حصہ بن سکتے ہیں۔

تعلیمی معیار کے حوالے سے بھی واضح ہدایات جاری کی گئی ہیں۔ پبلک یونیورسٹی اور کالج کے طلبہ کے لیے کم از کم 65 فیصد نمبر ضروری ہیں۔ میڈیکل اور ڈینٹل کے طلبہ کے لیے 80 فیصد، ڈی وی ایم کے طلبہ کے لیے 75 فیصد جبکہ نرسنگ کے طلبہ کے لیے کم از کم 65 فیصد نمبرز ہونا لازمی قرار دیا گیا ہے۔

درخواست دینے کا طریقہ بھی آسان رکھا گیا ہے۔ طلبہ سرکاری ویب سائٹ cmlaptophed.punjab.gov.pk پر جا کر آن لائن فارم بھر سکتے ہیں۔ حکام کے مطابق درخواست جمع کروانے کی آخری تاریخ 15 فروری 2026 مقرر کی گئی ہے۔