رمضان میں روزے کتنے گھنٹے کے ہوں گے؟ اہم خبر آگئی

رمضان المبارک 2026 کے دوران دنیا بھر میں روزے کے دورانیے سے متعلق تفصیلات سامنے آ گئی ہیں۔

مختلف ممالک میں روزے کے اوقات موسم اور جغرافیائی محلِ وقوع کے باعث ایک دوسرے سے مختلف ہوں گے۔ ماہرین کے مطابق اس بار رمضان کا آغاز موسمِ سرما کے اختتام اور بہار کے آغاز کے قریب ہوگا، جس کے باعث دن آہستہ آہستہ لمبے ہوتے جائیں گے۔

پاکستان میں رمضان المبارک کے دوران روزے کا دورانیہ تقریباً 13 سے ساڑھے 13 گھنٹے تک رہنے کا امکان ہے۔ رمضان کے ابتدائی دنوں میں روزہ تقریباً 13 گھنٹے کا ہوگا، جبکہ مہینے کے اختتام تک یہ دورانیہ بڑھ کر ساڑھے 13 گھنٹے کے قریب پہنچ سکتا ہے۔

دیگر مسلم ممالک میں بھی روزے کے اوقات میں فرق دیکھنے کو ملے گا۔ کئی ممالک میں رمضان کے آغاز پر روزے تقریباً 12 گھنٹے کے ہوں گے، جو بعد میں بڑھ کر 13 گھنٹے تک پہنچ جائیں گے۔ ماہرین کا کہنا ہے کہ چونکہ رمضان 2026 شمالی نصف کرے میں بہار کے آغاز کے ساتھ آ رہا ہے، اس لیے دن کی روشنی کا وقت بتدریج بڑھتا رہے گا۔

مشرق وسطیٰ اور شمالی افریقہ کے ممالک میں روزے کا دورانیہ نسبتاً معتدل رہے گا۔ مصر میں روزہ تقریباً 12 گھنٹے 40 منٹ سے شروع ہو کر مہینے کے آخر میں 13 گھنٹے تک جا سکتا ہے۔ اسی طرح سعودی عرب، متحدہ عرب امارات، قطر، بحرین، کویت اور عمان میں بھی روزے کا دورانیہ عموماً 12 سے 13 گھنٹوں کے درمیان رہنے کی توقع ہے۔

شمالی افریقہ کے ممالک جیسے مراکش، الجزائر اور تیونس میں بھی دن کے اوقات میں معمولی فرق ہو سکتا ہے، جس کے باعث روزے کی مدت میں ہلکا سا فرق آئے گا۔

یورپی ممالک میں صورتحال کچھ مختلف ہوگی۔ برطانیہ، جرمنی اور اسکینڈینیویا جیسے ممالک میں بلند عرضِ بلد کے باعث روزے نسبتاً طویل ہوں گے۔ تاہم 2026 میں یہ دورانیہ انتہائی زیادہ نہیں ہوگا، لیکن پھر بھی مشرق وسطیٰ کے مقابلے میں زیادہ رہے گا۔

امریکا میں بھی روزے کا دورانیہ مختلف شہروں میں مختلف ہوگا۔ نیویارک میں رمضان کے آغاز پر روزہ تقریباً ساڑھے 12 گھنٹے کا ہوگا، جو مارچ کے اوائل تک بڑھ کر 13 گھنٹے یا اس سے کچھ زیادہ ہو سکتا ہے۔

واضح رہے کہ رمضان المبارک 2026 کی حتمی تاریخ چاند دیکھنے کے بعد ہی طے کی جائے گی۔ فلکیاتی حسابات کے مطابق متحدہ عرب امارات میں رمضان کا آغاز 19 فروری 2026 کو متوقع ہے، تاہم سعودی عرب میں 29 شعبان کو رویتِ ہلال کے بعد باضابطہ اعلان کیا جائے گا۔