ہفتہ کی رات بانی پی ٹی آئی کا پمز میں طبی معائنہ ہوا، وفاقی وزیر اطلاعات

وفاقی وزیر اطلاعات عطا تارڑ نے بانی پی ٹی آئی کی صحت سے متعلق گردش کرنے والی خبروں کی وضاحت کرتے ہوئے کہا ہے کہ بانی پی ٹی آئی بالکل صحت مند ہیں۔

عطا تارڑ کے مطابق ہفتہ کی رات بانی پی ٹی آئی کو طبی معائنے کے لیے پمز اسپتال منتقل کیا گیا، جہاں آنکھوں کے ماہر ڈاکٹروں نے ان کا مکمل معائنہ کیا۔

وزیر اطلاعات نے بتایا کہ یہ طبی معائنہ تقریباً 20 منٹ تک جاری رہا، جس کے بعد بانی پی ٹی آئی کو دوبارہ اڈیالہ جیل منتقل کر دیا گیا۔

ان کا کہنا تھا کہ ڈاکٹروں نے معمول کی طبی کارروائی کے لیے پمز لے جانے کی تجویز دی تھی، جس پر عمل کیا گیا۔

عطا تارڑ نے واضح کیا کہ بانی پی ٹی آئی کی صحت تسلی بخش ہے اور تشویش کی کوئی بات نہیں۔

وفاقی وزیر اطلاعات کے مطابق حکومت کی جانب سے تمام قیدیوں کو قانون کے مطابق طبی سہولتیں فراہم کی جا رہی ہیں اور اس معاملے میں کسی قسم کی کوتاہی نہیں برتی جا رہی۔