ایران سے جوہری مذاکرات میں بالواسطہ طور پر شامل رہوں گا : ٹرمپ

امریکی صدر ڈونلڈ ٹرمپ نے اعلان کیا ہے کہ وہ ایران اور امریکا کے درمیان ہونے والے جوہری مذاکرات کے دوسرے مرحلے میں بالواسطہ طور پر شامل رہیں گے۔

صدر ٹرمپ نے طیارے میں صحافیوں سے گفتگو کرتے ہوئے کہا کہ یہ مذاکرات نہایت اہم ہیں اور وہ ان میں بالواسطہ کردار ادا کریں گے۔ ان کے مطابق ایران سخت مؤقف اختیار کرنے والا مذاکراتی فریق ہے، تاہم تہران اس بار کسی معاہدے تک پہنچنے میں دلچسپی رکھتا ہے۔

ادھر خلیج میں فوجی سرگرمیاں بھی جاری ہیں۔ ایران کی پاسداران انقلاب نے آبنائے ہرمز میں مشقیں شروع کی ہیں۔ ایران پہلے ہی خبردار کر چکا ہے کہ کسی حملے کی صورت میں وہ اس اہم آبی گزرگاہ کو بند کر سکتا ہے، جہاں سے دنیا کی بڑی مقدار میں تیل کی ترسیل ہوتی ہے۔ ایسی کسی پیش رفت سے عالمی منڈیوں میں تیل کی قیمتوں میں شدید اضافہ ہو سکتا ہے۔