گاڑی خریدنے کے خواہشمند افراد کیلئے بڑی خوشخبری

حکومت نے درآمدی پالیسی آرڈر 2022 میں اہم ترمیم کرتے ہوئے پرانی استعمال شدہ گاڑیوں کی کمرشل بنیادوں پر درآمد کی اجازت دے دی ہے۔

 وزارت تجارت کی جانب سے اس حوالے سے باضابطہ نوٹیفکیشن بھی جاری کر دیا گیا ہے، جس کے مطابق اب پانچ سال سے کم پرانی گاڑیوں کو تجارتی بنیادوں پر درآمد کیا جا سکے گا۔

نئی پالیسی کے تحت یہ سہولت یکم اکتوبر 2025 سے 30 جون 2026 تک دستیاب ہوگی۔ حکام کے مطابق اس مدت کے بعد گاڑیوں کی عمر کی موجودہ حد ختم کیے جانے پر بھی غور کیا جا سکتا ہے۔

وزارت تجارت نے واضح کیا ہے کہ درآمد شدہ گاڑیوں کو ماحولیاتی تحفظ، سیفٹی اور کوالٹی کے بین الاقوامی معیارات پر پورا اترنا لازمی ہوگا۔ اس سلسلے میں انجینئرنگ ڈویلپمنٹ بورڈ (EDB) کی ٹیسٹنگ اور سرٹیفکیشن کی شرائط بھی لاگو ہوں گی تاکہ ملکی مارکیٹ میں معیاری اور محفوظ گاڑیاں دستیاب ہو سکیں۔

حکومت کی اس نئی پالیسی کو آٹو سیکٹر میں مسابقت بڑھانے، صارفین کو بہتر انتخاب فراہم کرنے اور ماحولیاتی بہتری کے تناظر میں ایک اہم پیشرفت قرار دیا جا رہا ہے۔