جن افغان مہاجرین کے پاس قانونی ویزے اور کاغذات ہیں وہ پاکستان میں رہ سکیں گے، وزیر دفاع

وفاقی وزیر دفاع خواجہ آصف نے کہا ہے کہ جن افغان مہاجرین کے پاس قانونی ویزے اور کاغذات ہیں وہ پاکستان میں رہ سکیں گے۔

تفصیلات کے مطابق وفاقی وزیر دفاع خواجہ آصف نے الجزیرہ عربیہ کو انٹرویو دیتے ہوئے کہا کہ پاکستان اور افغانستان کے درمیان جنگ بندی معاہدہ دہشت گردی کے خاتمے کے لیے ایک اہم پیش رفت ہے۔

انہوں نے کہا کہ قطر کے امیر شیخ تمیم بن حمد آل ثانی، ترک صدر طیب ایردوان اور ترک وفد کے سربراہ ابراہیم کا شکریہ ادا کرتے ہیں جن کی ثالثی سے یہ معاہدہ ممکن ہوا۔

ان کا کہنا تھا کہ معاہدے کا بنیادی مقصد دہشت گردی کے مسئلے کو ختم کرنا ہے، جو برسوں سے دونوں ممالک کے سرحدی علاقوں کو متاثر کر رہا ہے، گزشتہ ہفتے دہشت گردی کا مسئلہ براہِ راست جھڑپوں تک جا پہنچا تھا، تاہم دونوں ممالک اس نتیجے پر پہنچے ہیں کہ دہشت گردی کا فوری خاتمہ ضروری ہے۔

خواجہ آصف نے کہا کہ پاکستان اور افغانستان دہشت گردی پر قابو پانے کے لیے سنجیدہ کوششیں کریں گے، بصورتِ دیگر خطے کے امن کو سنگین خطرات لاحق ہو سکتے ہیں۔

وزیر دفاع نے بتایا کہ یہ معاہدہ قطر اور ترکیے کی ثالثی سے ہوا ہے اور اس کی تفصیلات کو حتمی شکل دینے کے لیے ایک اور اجلاس آئندہ ہفتے استنبول میں ہو گا۔ افغان وزیرِ دفاع نے تسلیم کیا ہے کہ دہشت گردی ہی تعلقات میں تناؤ کی اصل وجہ ہے، جسے اب قابو میں لایا جائے گا۔

انہوں نے کہا کہ ایک مؤثر طریقہ کار واضح کیا جائے گا تاکہ دونوں ممالک کے درمیان موجودہ مسائل کو حل کیا جا سکے۔ معاہدے کی تفصیلات پر استنبول میں اتفاق کیا جائے گا جبکہ قطر اور ترکی کی موجودگی بذاتِ خود اس معاہدے کی ضمانت ہے۔

ان کا کہنا تھا کہ پاکستان نے گزشتہ برسوں میں جانی و مالی نقصان اٹھایا ہے لیکن امید ہے کہ اب امن بحال ہو گا اور دونوں ممالک کے تعلقات معمول پر آ جائیں گے۔

خواجہ آصف نے کہا کہ نتیجتاً پاک افغان تجارت اور ٹرانزٹ دوبارہ شروع ہوں گے اور افغانستان پاکستانی بندرگاہوں کو استعمال کر سکے گا۔ جن افغان مہاجرین کے پاس قانونی ویزے اور کاغذات ہیں وہ پاکستان میں رہ سکیں گے، جبکہ بغیر دستاویز مہاجرین کی واپسی جاری رہے گی۔

وزیر دفاع کا کہنا تھا کہ پاک افغان بارڈر کا استعمال باضابطہ ہونا چاہیے جیسا کہ دنیا کے دیگر ممالک میں ہوتا ہے۔

انہوں نے کہا کہ خدشات کے خاتمے کے حوالے سے یہ کہنا قبل از وقت ہے کہ ہم 100 فیصد مطمئن ہیں، آنے والے ہفتوں اور مہینوں میں دیکھنا ہو گا کہ معاہدے پر کتنا عمل ہوتا ہے۔

ان کا کہنا تھا کہ پاکستان اور افغانستان صدیوں سے ہمسائے ہیں اور جغرافیہ بدلا نہیں جا سکتا، امید ہے کہ اس معاہدے کے بعد دونوں ممالک بہتر تعلقات کے ساتھ آگے بڑھ سکیں گے۔

خواجہ آصف نے مزید کہا کہ برادر ممالک قطر اور ترکی کی موجودگی نے ہمیں اعتماد دیا ہے اور ہم ان کے شکر گزار ہیں۔