انسانی جانوں کے تحفظ کیلئے رضوی برادران کی گرفتاری اولین ترجیح ہے؛ عظمیٰ بخاری

پنجاب کی وزیر اطلاعات عظمیٰ بخاری نے کہا ہے کہ رضوی برادران کی گرفتاری بہت جلد عمل میں لائی جائے گی اور یہ کارروائی انسانی جانوں کے تحفظ کے لیے ضروری ہے۔

لاہور میں پریس کانفرنس کرتے ہوئے عظمیٰ بخاری نے بتایا کہ مذہبی جماعت کے احتجاج کے دوران پولیس اہلکاروں پر حملے کیے گئے جبکہ مظاہرین نے گاڑیاں چھینیں، آگ لگائی اور شہری املاک کو نقصان پہنچایا۔

انہوں نے کہا کہ "عبادت گاہوں کو جلانا یا غیر مسلموں سے زیادتی کرنا ہمارا مذہب نہیں سکھاتا۔

وزیر اطلاعات کے مطابق غزہ اور فلسطین کی حمایت کے نام پر پرتشدد کارروائیاں کی گئیں۔ ٹی ایل پی کے کارکنوں سے فائر آرمز، غلیلیں، اور کیل لگے ڈنڈے برآمد ہوئے۔

عظمیٰ بخاری نے بتایا کہ پولیس اہلکار انہی پسٹولوں کی گولیوں سے زخمی ہوئے، اور کچھ شہریوں کی جانیں بھی ضائع ہوئیں۔

انہوں نے مزید کہا کہ وفاقی حکومت جلد ٹی ایل پی سے متعلق اہم فیصلہ کرے گی۔ "رضوی برادران کی گرفتاری ریاستی ذمہ داری ہے، جلد گرفتار کر لیا جائے گا۔

وزیر اطلاعات نے خبردار کیا کہ اگر کسی نے دوبارہ انتشار پھیلانے کی کوشش کی تو سخت کارروائی ہوگی۔

ان کا کہنا تھا کہ "ریاست سے لڑنے کی کوشش نہ کریں، حکومت اپنے فیصلوں سے پیچھے نہیں ہٹے گی۔”

عظمیٰ بخاری نے بتایا کہ مارکیٹیں بند کرانے یا ٹرانسپورٹ روکنے والوں کے خلاف دہشت گردی کے مقدمات درج ہوں گے۔ انتہاپسند تنظیموں کے پوسٹرز اور تشہیر پر مکمل پابندی لگا دی گئی ہے تاہم کسی مسجد کو بند نہیں کیا گیا۔

انہوں نے یہ بھی بتایا کہ پنجاب میں اب کسی کو اسلحے کا لائسنس جاری نہیں کیا جائے گا۔ لائسنس کے بغیر کام کرنے والے اسلحہ ڈیلرز کی دکانیں سیل کر دی گئی ہیں۔

ان کے مطابق 90 ڈیلرز کے کاغذات کی جانچ جاری ہے جبکہ 511 اسلحہ ڈیلرز نے لائسنس کی توثیق کے لیے درخواستیں دی ہیں۔

وزیر اطلاعات نے کہا کہ حکومت پنجاب کو اسلحے سے پاک بنانے کے عزم پر قائم ہے اور اس مقصد کے لیے سخت اقدامات جاری رہیں گے۔