گاڑی اور موٹرسائیکل میں پیٹرول بھروانے والے صارفین کیلئے اوگرا کا اہم اعلان

اوگرا نے عوام کو پوری مقدار میں پیٹرول کی فراہمی یقینی بنانے کے لیے ملک بھر میں کارروائیاں تیز کر دی ہیں۔ اس مقصد کے لیے انفورسمنٹ ٹیمیں متحرک کر دی گئی ہیں جو مختلف شہروں میں پیٹرول پمپس کی جانچ کر رہی ہیں۔

تفصیلات کے مطابق آئل اینڈ گیس ریگولیٹری اتھارٹی نے پیٹرول پمپس پر مقدار اور معیار کی نگرانی شروع کر دی ہے۔ چیئرمین اوگرا مسرور خان نے خود انفورسمنٹ ٹیموں کے ہمراہ مختلف پیٹرول پمپس کا دورہ کیا اور صورتحال کا جائزہ لیا۔

دوروں کے دوران پیٹرول پمپس کی قانونی حیثیت، لائسنس اور دیگر ضروری دستاویزات کی جانچ کی گئی۔ اس کے ساتھ ساتھ پیٹرولیم مصنوعات کے دستیاب اسٹاک کا بھی معائنہ کیا گیا تاکہ کسی قسم کی کمی یا غیر قانونی ذخیرہ اندوزی کا پتا چلایا جا سکے۔

چیئرمین اوگرا نے واضح ہدایات جاری کیں کہ تمام پیٹرول پمپس پر قوانین اور ضوابط پر سختی سے عملدرآمد کروایا جائے۔ انہوں نے کہا کہ عوام کو کم مقدار دینا یا کسی بھی قسم کی خلاف ورزی ناقابلِ برداشت ہے۔

اوگرا حکام کے مطابق قواعد کی خلاف ورزی کرنے والے پیٹرول پمپس کے خلاف بلاامتیاز کارروائی جاری رکھی جائے گی۔