ڈرائیونگ لائسنس ہولڈرز کی بڑی پریشانی دور ہوگئی

پنجاب ٹریفک پولیس نے شہریوں کے لیے ایک اہم وضاحت جاری کی ہے جس میں الیکٹرانک ڈرائیونگ لائسنس کو مکمل طور پر قانونی اور قابلِ قبول قرار دیا گیا ہے۔

پنجاب ٹریفک پولیس کے مطابق اگر کسی شہری کو دورانِ چیکنگ کسی ٹریفک اہلکار کی جانب سے ای لائسنس تسلیم نہ کیے جانے کا مسئلہ پیش آئے تو وہ فوری طور پر شکایت درج کروا سکتا ہے۔ محکمہ نے واضح کیا ہے کہ ایسی شکایات پر متعلقہ اہلکار کے خلاف کارروائی کی جائے گی۔

ایڈوائزری میں بتایا گیا ہے کہ شکایت درج کروانے کے لیے شہری پنجاب ٹریفک پولیس کی ہیلپ لائن 1787 پر کال کر سکتے ہیں۔ اس کے علاوہ واٹس ایپ نمبر 0318-4642936 پر بھی اپنی شکایت، تفصیلات کے ساتھ، بھیجی جا سکتی ہے تاکہ فوری کارروائی ممکن ہو سکے۔

محکمے کے مطابق الیکٹرانک ڈرائیونگ لائسنس پنجاب ٹریفک پولیس کی ڈیجیٹل سروسز کا حصہ ہے۔ اسے باقاعدہ طور پر قانونی حیثیت حاصل ہے اور تمام ٹریفک اہلکار اس کے پابند ہیں کہ وہ ای لائسنس کو تسلیم کریں۔