خیبر پختونخوا : پچھلے دو ماہ میں دہشت گردی کے 185 واقعات رپورٹ

خیبر پختونخوا میں رواں برس کے پہلے دو ماہ کے دوران بدامنی کے مجموعی طور پر 185 واقعات رپورٹ ہوئے ہیں۔

صوبائی حکومت کی مرتب کردہ رپورٹ کے مطابق جنوری اور فروری کے مہینوں میں دہشت گردی اور بدامنی کے واقعات میں تیزی دیکھی گئی ہے، جن کی مجموعی تعداد 185 ہے۔

رپورٹ کے مطابق ان واقعات میں فائرنگ کے ترانوے، آئی ای ڈی بلاسٹ کے بیس، مارٹر گولے پھٹنے کے اکتالیس اور بارودی سرنگوں کے تین دھماکے شامل ہیں۔

یہ بھی پڑھیں : شمالی بلوچستان اور خیبر پختونخوا میں دراندازی کی کوشش ناکام، 67 افغان طالبان ہلاک

صوبے کے اضلاع میں سب سے زیادہ ساٹھ واقعات شمالی وزیرستان میں رپورٹ ہوئے، اس کے بعد باجوڑ اور خیبر کے علاقے متاثر رہے۔

ان دو ماہ کے دوران دہشت گردی کے واقعات میں ایک سو سے زائد پولیس اہلکار، شہری اور لیویز کے جوان جاں بحق اور زخمی ہوئے ہیں۔ حکومت ان اعداد و شمار کی روشنی میں امن و امان کی بحالی کے لیے مزید اقدامات کر رہی ہے۔