بابر اعظم مداحوں سے اپیل کرنے پر کیوں مجبور ہوئے؟

قومی کرکٹ ٹیم کے مایہ ناز بلے باز بابر اعظم نے مداحوں سے اپیل کی ہے کہ انہیں کنگ شنگ کہنا بند کیا جائے۔

سہ فریقی سریز میں جنوبی افریقا کے خلاف پاکستان کی جیت کی بعد بات کرتے ہوئے بابر اعظم کا کہنا تھا کہ جب بھی بیٹنگ کے لیے جاتا ہوں تو یہی سوچ کر جاتا ہوں کہ اچھا اسکور کرنا ہے مگر  بدقسمتی سے فنش نہیں کر پا رہا۔

انہوں نے کہا کہ کپتان محمد رضوان اور ان کے نائب سلمان علی آغا نے اچھا کھیلا ہے، ایسی کارکردگی سے ٹیم میں اعتماد آتا ہے۔

بابر اعظم کا کہنا تھا کہ مجھے کنگ شنگ کہنا بند کریں، میں ابھی کوئی کنگ نہیں، جب چھوڑیں گے تب دیکھیں گے۔

سابق کپتان نے کہا کہ میرے لیے اوپننگ ایک نیا رول ہے، ٹیم کی ڈیمانڈ پر یہ ذمہ داری لی ہے،  البتہ جب اننگز بنتی ہے تو گیم چلانے کے ساتھ پچ کا اندازہ بھی ہوجاتا ہے۔

بابر اعظم نے کہا کہ کوشش کرتا ہوں ہ اچھا کھیلوں مگر سیٹ ہونے کے بعد لمبی اننگز نہیں کھیل پا رہا ہوں۔

قومی کھلاڑی کا کہنا تھا کہ میں خود سے بات کرتا ہوں کیسے اس صورتحال سے نکلنا ہے، میں نے جو پہلے کیا وہ ماضی ہے، میں پچھلی پرفارمنس میں رہا تو آگے نہیں پرفارم کر  پاؤں گا۔

اپنی بات جاری رکھتے ہوئے بابر اعظم نے کہا کہ جو پہلے کیا وہ دن گزر گیا، اگلے دن نیا پلان اور نیا مائند سیٹ ہوتا ہے، جب بڑا ٹوٹل عبور کرکے کامیاب ہوتے ہیں تو اس سے اعتماد ملتا ہے۔