کراچی کنگز کی ملتان سلطانز کو 4 وکٹوں سے شکست

پی ایس ایل 10 میں کراچی کنگز نے ملتان سلطان کو سنسنی خیز مقابلے کے بعد 4 وکٹوں سے شکست دے دی۔

رضوان کی سنچری ایسا لگتا ہے رائیگاں ہی چلی گئی۔ کراچی میں جاری پی ایس ایل سیزن 10 کے میچ میں کراچی کنگز نے سنسنی خیز مقابلے کے بعد ملتان سلطان کو 4 وکٹوں سے ہرا کر ناقدین کے منہ بند کردیے۔

رضوان اس ایڈیشن کی پہلی سنچری بنانے میں کامیاب رہے، انھوں نے 105رنز کی ناقابل شکست اننگز کھیلی۔ محمد رضوان نے 63 گیندوں پر پانچ چھکوں اور 9 چوکوں کی مدد سے یہ اننگز کھیلی۔ کیوی آل راؤنڈر مائیکل بریسویل نے 17 گیندوں پر 44 رنز اسکور کیے، اُن کے علاوہ کامران غلام نے 36 رنز بنائے۔

ملتان سلطانز نے مقررہ20 اوورز میں 3 وکٹوں کے نقصان پر 234رنز بنائے۔ کراچی کنگز کی جانب سے حسن علی، عباس آفریدی اور خوشدل شاہ نے ایک ایک وکٹ حاصل کی۔

ملتان سلطانز کے 235 رنز کے ہدف کے تعاقب میں کراچی کنگز کی ابتدائی 4 وکٹیں 79 رنز پر گرچکی تھیں تاہم جیمز ونس اور خوشدل شاہ نے جارحانہ کھیل پیش کیا۔ پانچویں وکٹ پر 142 رنز کی شراکت قائم ہوئی اور جیمز ونس نے فتح گر سنچری اننگز کھیلی اور 101 رنز بنا کر آؤٹ ہوئے۔

کراچی کنگز نے آخری اوور میں  6 وکٹوں کے نقصان پر 235 رنز کا ہدف حاصل کرلیا اور ملتان سلطانز کو 4 وکٹوں سے شکست دی۔ خوشدل شاہ 60 رنز بناکر نمایاں رہے۔ ملتان سلطانز کی جانب سے عاکف جاوید نے 3 وکٹیں حاصل کیں۔