کیا بھارتی کپتان پاک بھارت میچ میں پاکستانی کھلاڑیوں سے ہاتھ ملائیں گے؟

بھارتی کرکٹ ٹیم کےکپتان سوریا کمار یادیو ایشیا کپ میں کل پاکستان ٹیم کےساتھ ہونے والے میچ میں ہاتھ ملانے کا سوال خوب صورتی سے گول کرگئے۔

ابوظبی میں پریس کانفرنس کے دوران سوریا کمار یادیو کا کہنا تھا کہ پاکستان کے خلاف میچ میں گیند اور بلے کا اچھا مقابلہ ہوگا، ہر گیم نیا چیلنج ہوتا ہے۔

ایک صحافی نے سوال کیا کہ پچھلے میچ میں اچھا کھیلا ، کیا اگلے میں میچ میں بھی بھارتی ٹیم وہی کرےگی جیسا پچھلے میچ میں کیا ؟

اس  پر بھارتی کپتان اس سوال کو ہنستے ہوئے یہ کہ کر ٹال گئے کہ اوہ اچھا آپ بولنگ کی بات کررہے ہیں، ہم نے بولنگ اچھی کی تھی ۔

سوریا کمار یادیو کا کہنا تھا کہ پاک بھارت رقابت کا کچھ نہیں کہہ سکتا، جب اسٹیڈیم شائقین سے بھر جاتا ہے تو سوچتاہوں کہ اچھی کرکٹ کھیلوں، آیندہ میچ میں بھی بال اور بیٹ کا اچھا مقابلہ شائقین دیکھیں گے۔

یاد رہے کہ  گزشتہ اتوار 14 ستمبر کو دبئی انٹرنیشنل کرکٹ اسٹیڈیم میں پاکستان اور بھارت کے درمیان ایشیا کپ کا اہم میچ کھیلا گیا جس میں بھارتی ٹیم نے اسپورٹس مین اسپرٹ کو مکمل طور پر نظر انداز کیا تھا۔

پاکستان کے خلاف اس میچ میں بھارت کو 7 وکٹوں سے کامیابی حاصل ہوئی لیکن بھارتی کپتان سوریا کمار نے ٹاس کے موقع پر پاکستان کے کپتان سے ہاتھ نہ ملایا جب کہ بھارتی ٹیم نے میچ ختم ہونے کے بعد پاکستانی کھلاڑیوں سے روایت کے مطابق ہاتھ نہ ملاکر اسپورٹس مین اسپرٹ کی دھجیاں اڑا دیں، بھارت کے اس رویے پر اسے شدید تنقید کا سامنا کرنا پڑا تھا۔