پے در پے ناکامیاں؛ پی سی بی کا بڑا فیصلہ

پاکستان کرکٹ بورڈ (پی سی بی) نے ملک بھر میں نوجوان کرکٹرز کی تلاش کے لیے اسکول سطح پر ٹیلنٹ ہنٹ پروگرام کا باضابطہ آغاز کر دیا ہے۔

 اس پروگرام کا افتتاح چیئرمین پی سی بی محسن نقوی نے کیا، جہاں انہوں نے ایونٹ کی ٹرافی کی رونمائی کی اور شریک ٹیموں میں کٹ بیگز تقسیم کیے۔

محسن نقوی نے اس موقع پر کہا کہ اس قومی سطح کے پروگرام میں ملک کے مختلف شہروں سے تعلق رکھنے والے 391 اسکولز حصہ لے رہے ہیں، جس کا مقصد نوجوان کھلاڑیوں کو آگے لانا اور قومی ٹیم کے لیے نیا ٹیلنٹ تیار کرنا ہے۔

انہوں نے اُمید ظاہر کی کہ اس ایونٹ سے ابھرنے والے باصلاحیت کھلاڑی مستقبل میں قومی ٹیم کی نمائندگی کرتے ہوئے پاکستان کا نام روشن کریں گے۔

پی سی بی کے مطابق اس ٹیلنٹ ہنٹ پروگرام کے دوران نمایاں کارکردگی دکھانے والے کھلاڑیوں کو انڈر 15، انڈر 17 اور انڈر 19 کی ریجنل ٹیموں اور اکیڈمیوں میں شامل کیا جائے گا، تاکہ ان کی پیشہ ورانہ تربیت کی جا سکے اور انہیں بہتر مواقع فراہم کیے جا سکیں۔