جنوبی افریقی کرکٹر رباڈا نے 119 سال پرانا ریکارڈ توڑ کر نئی تاریخ رقم کر دی

راولپنڈی: جنوبی افریقی کرکٹر رباڈا نے پاکستان کیخلاف دوسرے ٹیسٹ میں شاندار اننگز کھیل کر 119 سال پرانا ریکارڈ توڑ دیا۔

بدھ کو پنڈی اسٹیڈیم میں پاکستان کے پہلی اننگز کے 333 رنز کے جواب میں جنوبی افریقی بیٹر رباڈا 11ویں نمبر پر بیٹنگ کرنے آئے  اور صرف 61 گیندوں پر 71 رنز  کی اننگز کھیل کر اپنی ٹیم کو سبقت دلانے میں کامیاب ہوئے۔

رباڈا نے اپنی اننگز کے دوران  4  چوکے اور 4 چھکے لگائے اور دسویں وکٹ کے لیے  متھوسامے کے ساتھ 98 رنز کی قیمتی شراکت قائم کی۔

رباڈا کی شاندار اننگز کی بدولت جنوبی افریقا نے پاکستان کے خلاف پہلی اننگز میں 404 رنز اسکور کیے اور 71 رنز کی اہم برتری حاصل کی۔

 اسی کے ساتھ رباڈا نے ٹیسٹ کرکٹ میں جنوبی افریقا کی جانب سے  11 ویں نمبر پر بیٹنگ کرتے ہوئے سب  بڑا انفرادی اسکور کا 119 سال پرانا ریکارڈ توڑ دیا۔

واضح رہے کہ ٹیسٹ کرکٹ میں 11 ویں نمبر کے بیٹر  کی جانب سے سب سے زیادہ رنز بنانے کا عالمی ریکارڈ آسٹریلیا کے ایشٹن ایگر کے پاس ہے، جنہوں نے  2013 میں ایشیز سیریز  ٹیسٹ میں انگلینڈ کے خلاف  98 رنز بنائے تھے۔

رباڈا  سے قبل جنوبی افریقا کی جانب سے ٹیسٹ کرکٹ میں 11 ویں نمبر پر بیٹنگ کرتے ہوئے سب سے زیادہ انفرادی اسکور کا ریکارڈ برٹ وولگر کے نام تھا، جنہوں نے 1906 میں انگلینڈ کے خلاف کیپ ٹاؤن ٹیسٹ کی پہلی اننگز میں ناقابلِ شکست 62 رنز بنائے تھے۔