معروف پاکستانی کھلاڑی نے ریٹائرمنٹ کا اعلان کردیا
معروف پاکستانی کھلاڑی نے ریٹائرمنٹ کا اعلان کردیا
پاکستان کے لیجنڈ ٹینس اسٹار اعصام الحق پروفیشنل ٹینس کو الوداع کہہ کر ہمیشہ کے لیے ٹینس کورٹ سے رخصت ہوگئے۔
اسلام آباد میں ہونے والے اے ٹی پی چیلنجر کپ کا مینز ڈبلز فائنل ان کے طویل اور کامیاب کیریئر کا آخری مقابلہ بنا۔
فائنل میں اعصام الحق اور ان کے ساتھی مزمل مرتضیٰ کو حریف جوڑی نے اسٹریٹ سیٹ میں شکست دی۔

میچ کے بعد گفتگو کرتے ہوئے اعصام الحق نے فاتح ٹیم کو مبارک باد پیش کی اور اپنے کیریئر کے دوران غیر مشروط حمایت پر اہلِ خانہ، کوچز، فیڈریشن اور مداحوں کا شکریہ ادا کیا۔
انہوں نے کہا کہ پاکستان ٹینس فیڈریشن کے صدر کی حیثیت سے ان کی کوشش رہے گی کہ نوجوان ٹیلنٹ کو بہترین تربیتی مواقع اور سہولیات فراہم کی جائیں۔
ان کا کہنا تھا کہ پاکستان میں اے ٹی پی ٹورنامنٹ کا انعقاد ایک بڑی کامیابی ہے جس نے ملک میں ٹینس کے فروغ کی نئی راہ ہموار کی ہے۔
چند روز قبل اعصام الحق نے پروفیشنل ٹینس سے ریٹائرمنٹ کا اعلان کیا تھا، جس کے بعد اب ان کا آخری مقابلہ بھی مکمل ہوچکا ہے۔
اعصام الحق کا ناقابلِ فراموش کیریئر
پاکستان کے سب سے کامیاب ٹینس کھلاڑی کے طور پر اعصام الحق نے ملک کی نمائندگی کرتے ہوئے کئی ریکارڈ قائم کیے۔
انہوں نے اپنے کیریئر میں 18 اے ٹی پی ورلڈ ٹور ٹائٹلز اور 28 اے ٹی پی چیلنجر ٹائٹلز اپنے نام کیے۔ ڈبلز کیٹیگری میں انہوں نے 17 آئی ٹی ایف فیوچر ٹائٹلز جیتے، جبکہ سنگلز میں 5 آئی ٹی ایف ٹائٹلز حاصل کیے۔ ایک اے ٹی پی چیلنجر سنگلز ٹائٹل بھی اعصام کے کیریئر کا حصہ ہے۔
اعصام الحق ڈیوس کپ میں پاکستان کی جانب سے سنگلز اور ڈبلز دونوں میں سب سے زیادہ فتوحات حاصل کرنے والے کھلاڑی بھی ہیں، جو ان کے طویل عرصے تک مسلسل اعلیٰ معیار کا کھیل پیش کرنے کا ثبوت ہے۔
کیریئر کے آخری میچ کے بعد تماشائیوں، ساتھی کھلاڑیوں اور آفیشلز نے کھڑے ہو کر اعصام الحق کو خراجِ تحسین پیش کیا، اور یوں پاکستان کی ٹینس تاریخ کا ایک روشن باب باوقار انداز میں ختم ہوا۔
Catch all the کھیل News, Breaking News Event and Trending News Updates on GTV News
Join Our Whatsapp Channel GTV Whatsapp Official Channel to get the Daily News Update & Follow us on Google News.










