غزہ جنگ بندی؛ خوثیوں کا اسرائیل پر حملے بند کرنے کا اعلان

قابض ریاست اسرائیل اور مزاحمتی تنظیم حماس کے درمیان غزہ جنگ بندی معاہدے کے اعلان کے بعد یمن کے حوثی باغیوں نے بھی صہیونی رجیم کیخلاف عسکری کارروائیاں بند کرنے کا اعلان کردیا۔

عرب میڈیا کی رپورٹس کے مطابق یمن کے حوثی رہنماؤں نے غزہ جنگ بندی معاہدے کو خوش آئند قرار دیتے ہوئے کہا کہ ہم اسرائیل اور حماس کے درمیان معاہدے کا احترام کریں گے اور مکمل پاسداری کو یقینی بنائیں گے۔

حوثی باغیوں کے ترجمان نے بیان میں کہا کہ اسرائیل پر منحصر ہے کہ وہ کتنے عرصے تک خود کو محفوظ رکھ پاتا ہے اور ایسا وہ معاہدے کے مندرجات پر عمل کرکے کرسکتا ہے۔

یاد رہے کہ اسرائیل کے غزہ میں حماس پر اور لبنان میں حزب اللہ کو نشانہ بنائے جانے پر حوثیوں نے یمن سے اسرائیلی سرزمین پر میزائل اور ڈرون برسائے تھے۔

حوثیوں نے امریکا، اسرائیل اور مغربی ممالک کے بحری مال بردار جہازوں کو بھی نشانہ بنایا تاکہ غزہ میں جارحیت کو رکوایا جا سکے۔