اسرائیل کے ہاتھوں 15ماہ میں47 ہزار فلسطینیوں کی شہادتیں ہوئیں

اسرائیل اور حماس کے درمیان جنگ بندی اور یرغمالیوں کے تبادلے کا بالآخر معاہدہ طے پاگیا جس کا اطلاق 19 جنوری سے ہوگا۔

بدھ کو قطر کے دارالحکومت دوحہ میں وزیر اعظم محمد بن عبد الرحمان بن جاسم الثانی نے غزہ جنگ بندی معاہدہ طے پانے کا اعلان کیا اور کہا ہے کہ جنگ بندی معاہدہ کروانے کے لیے قطر، مصر اور امریکا کی کوششیں کامیاب ہوگئی ہیں۔

انہوں نے کہا کہ جنگ بندی کا اطلاق19 جنوری سے ہوگا، حماس اور اسرائیل کے ساتھ جنگ بندی کے مراحل پر عمل درآمد کے حوالے سے کام جاری ہے۔

قطری وزیر اعظم نے بتایا کہ معاہدے کے پہلے مرحلے میں اسرائیلی یرغمالیوں اور فلسطینی قیدیوں کی رہائی ہوگی۔ معاہدے کے پہلے مرحلے میں بے گھر افراد کی گھروں کو واپسی شامل ہے۔

مزید پڑھیں:جنگ بندی معاہدہ غزہ کے بہادر جانبازوں کی مزاحمت کا نتیجہ قرار

عالمی رپورٹ کے مطابق 7 اکتوبر 2023 سے غزہ میں 15 ماہ ایک ہفتے تک جاری جنگ میں صیہونی حکومت کی جانب سے فلسطینیوں پر 85 ہزار ٹن بارود برسایا گیا۔

رپورٹ کے مطابق اسرائیل کی جانب سے غزہ میں 47 ہزار سے زائد فلسطینیوں کی نسل کشی اور ایک لاکھ 15 ہزار زخمی کیے گئے۔

تباہ شہروں کی عمارتوں اورگھروں کے ملبے سے ہزاروں لاپتہ فلسطینیوں کی لاشیں ملنے کا خدشہ ہے جبکہ ملبہ ہٹانے میں 10 سال سے زائد لگنے کا امکان ہے۔ 15 ماہ ایک ہفتے تک جاری رہنے والی جنگ میں نقل مکانی پر مجبور کیے گئے 20 لاکھ فلسطینی اجڑے گھروں کو لوٹنے کے منتظر ہیں۔

مزید پڑھیں:غزہ جنگ بندی؛ حماس نے یرغمالیوں کی رہائی، معاہدے کی منظوری دیدی