ملائیشیاء نے جنگ عظیم میں تباہ ہونے والے بحری جہاز کے ملبے کی چوری پر چینی جہاز کو تحویل میں لے لیا

ملائیشیا نے دوسری جنگ عظیم کے دوران تباہ ہونے والے برطانوی جنگی بحری جہاز کے ملبے کی چوری کے الزام میں چینی جہاز کو تحویل میں لے لیا۔

ملائیشیا کے حکام نے دوسری جنگ عظیم کے دوران جزیرہ نما کے مشرقی ساحل پر ڈوبنے والے برطانوی جنگی جہازوں کے ملبے کو لوٹنے کے شبے میں ایک چینی رجسٹرڈ جہاز کو قبضے میں لے لیا ہے۔

ملائیشیا کی میری ٹائم انفورسمنٹ ایجنسی نے فیس بک پر ایک بیان میں کہا کہ فوزو میں رجسٹرڈ چوان ہانگ 68 کو 28 مئی کو ملائیشیا کی ریاست جوہر کے ساحل سے تحویل میں لیا گیا۔

بیان میں کہا گیا ہے کہ پولیس کے ساتھ مشترکہ آپریشن میں، افسران کو 100 بغیر پھٹنے والے توپ خانے کے گولے ملے۔ میری ٹائم ملائیشیا اس امکان کو رد نہیں کرتا کہ یہ جہاز پرانے برطانوی جنگی جہاز کے ملبے کی چوری میں ملوث ہے۔

یہ بھی پڑھیں : چین نے اپنا پہلا سویلین خلاباز اسپیس میں بھیج دیا

دسمبر 1941 میں جاپانی لڑاکا طیاروں کے حملے کے بعد برطانوی جنگی جہاز بحیرہ جنوبی چین میں ڈوب گئے۔ برطانوی بحری تاریخ کی بدترین تباہی میں تقریباً 850 ملاح ہلاک ہوئے۔ ملبے کو جنگی قبروں کا نام دیا گیا ہے۔

چوان ہانگ کو ابتدائی طور پر بغیر اجازت لنگر انداز ہونے پر تحویل میں لیا گیا تھا۔ حکام نے بتایا کہ عملے کے 32 افراد بشمول 21 چینی شہری، 10 بنگلہ دیشی اور ایک ملائیشین شہری سے پوچھ گچھ کی جا رہی ہے۔

بیجنگ میں چینی وزارت خارجہ کے ترجمان ماؤ ننگ نے صحافیوں کو بتایا کہ حکومت اس کیس سے آگاہ ہے۔