پلاسٹک فضلہ ڈیم میں جمع ہوگیا، کئی شہروں میں بجلی کی فراہمی معطل

جمہوریہ کانگو کے ایک بڑے ہائیڈرو الیکٹرک ڈیم میں بہنے والے پلاسٹک فضلے کی وجہ سے کئی بڑے شہر بجلی سے محروم ہوگئے۔

خبر ایجنسی رائٹرز کے مطابق روانڈا کی سرحد سے متصل جھیل کیوو کے جنوبی سرے پر واقع روزیزی ڈیم بوکاوو شہر اور دیگر کو بجلی فراہم کرتا ہے اور بجلی کی بندش سے مقامی کاروبار متاثر ہو رہے ہیں۔

یہ مسئلہ پلاسٹک کے بڑھتے ہوئے استعمال کے ساتھ ساتھ خطے میں کچرا جمع کرنے کی کمی سے جڑا ہوا ہے۔ بھاری بارش کی وجہ سے کچرا پہاڑی علاقے سے جھیل کی طرف بہہ جاتا ہے، جہاں یہ جمع ہوتا ہے اور مشینری کو روکتا ہے۔

نیشنل پاور کمپنی ایس این ای ایل کے صوبائی ڈائریکٹر لجووی مولیمنگابو نے خبر رساں ادارے روئٹرز کو بتایا کہ مشینوں کے لیے درکار دباؤ اور رفتار فراہم کرنے کے لیے پانی کو جبری نالیوں میں داخل ہونے میں دشواری کا سامنا ہے۔

ہر روز صفائی کرنے والے پلاسٹک کی بوتلیں، جیری کین اور دیگر ملبہ نکالنے کی کوشش کرتے ہیں جس کی وجہ سے ڈیم کی مشینری گھنٹوں تک بند رہتی ہے۔

صوبائی وزیر ماحولیات اور سبز معیشت ڈیڈیئر کابی ان لوگوں میں شامل ہیں جو اس مسئلے کا حل تلاش کرنے کے لیے کام کر رہے ہیں۔

انہوں نے رائٹرز کو دیے گئے ایک انٹرویو میں کہا کہ گھروں کو کچرا جمع کرنے والی تنظیم میں شامل ہونے سے جھیل میں پلاسٹک جمع ہونے سے روکنے میں مدد مل سکتی ہے۔