نادرا نے عوام کو بڑی خوشخبری سنادی

نیشنل ڈیٹا بیس اینڈ رجسٹریشن اتھارٹی نے شہریوں کے مسائل کے حل کیلئے کھلی کچہری کے انعقاد کا اعلان کردیا۔

نیشنل ڈیٹا بیس اینڈ رجسٹریشن اتھارٹی (نادرا) کی جانب سے جاری کردہ اعلامیے کے مطابق شہریوں کے مسائل کے فوری حل کے لیے 29 اگست کو کراچی میں کھلی کچہری کا انعقاد کیا جائے گا۔ یہ کھلی کچہریاں سیمنس چورنگی اور نارتھ ناظم آباد کے میگا سینٹرز میں منعقد کی جائیں گی۔

سیمنس چورنگی پر واقع میگا سینٹر، سائٹ انڈسٹریل ایریا میں کھلی کچہری صبح 11 بجے سے دوپہر 12 بجے تک جاری رہے گی، جبکہ نارتھ ناظم آباد کے میگا سینٹر (پلاٹ نمبر D-1/15، بلاک L، ضلع وسطی کراچی) میں یہ کچہری صبح 10 بجے سے 11 بجے تک منعقد ہوگی۔

نادرا نے شہریوں سے اپیل کی ہے کہ وہ اپنے متعلقہ علاقے کے مطابق شیڈول پر عمل کرتے ہوئے کھلی کچہری میں شرکت کریں اور شناختی دستاویزات یا دیگر امور سے متعلق مسائل کا موقع پر ازالہ کروائیں۔