ڈونلڈ ٹرمپ کی ایرانی عوام سے موجودہ نظام کے خلاف بغاوت کی اپیل

امریکی صدر ڈونلڈ ٹرمپ نے ایرانی عوام کے نام جاری ویڈیو پیغام میں ایرانی شہریوں کو موجودہ نظام کے خلاف اٹھ کھڑے ہونے کی ترغیب دی ہے۔

امریکی صدر ڈونلڈ ٹرمپ نے سماجی رابطے کی ویب سائٹ پر جاری کردہ اپنے ایک خصوصی ویڈیو پیغام میں ایرانی عوام سے براہ راست خطاب کیا ہے۔

انہوں نے ایرانی شہریوں پر زور دیا ہے کہ بمباری ختم ہونے کے بعد وہ موجودہ نظام کے خلاف اٹھ کھڑے ہوں اور اپنی تقدیر کا فیصلہ خود کریں۔

ڈونلڈ ٹرمپ کا کہنا تھا کہ اب ایرانیوں کے پاس ایک ایسا امریکی صدر موجود ہے، جو انہیں وہ سب کچھ فراہم کر رہا ہے، جس کی وہ خواہش رکھتے ہیں، اب یہ دیکھنا باقی ہے کہ ایرانی عوام اس صورتحال پر کیا ردعمل دیتے ہیں۔

انہوں نے مزید کہا کہ اب وہ وقت آ گیا ہے کہ ایرانی عوام اپنی قسمت کی باگ ڈور سنبھالیں اور اس خوشحال اور شاندار مستقبل کا آغاز کریں جو اب ان کی پہنچ میں آ چکا ہے۔

ایک اہم انٹرویو کے دوران جب صدر ٹرمپ سے یہ سوال پوچھا گیا کہ کیا وہ ایران میں عوامی بغاوت کی صورت میں امریکی بمباری کو طویل کرنے کا ارادہ رکھتے ہیں، تو انہوں نے اس پر کافی محتاط انداز اختیار کیا۔

انہوں نے صحافی کو جواب دیتے ہوئے کہا کہ وہ اس وقت کی مخصوص صورتحال کو دیکھ کر ہی کوئی فیصلہ کریں گے اور فی الحال اس طرح کے سوال کا حتمی جواب نہیں دیا جا سکتا۔ تاہم ان کے لہجے سے یہ واضح تھا کہ وہ زمینی حقائق کو مدنظر رکھ کر ہی اگلے اقدامات اٹھائیں گے۔

یہ بھی پڑھیں : ایرانی قوم کو غلام بنانے کا خواب کبھی پورا نہیں ہوگا : ایرانی آرمی چیف

دوسری جانب امریکی صدر نے اس اعتماد کا اظہار کیا ہے کہ ایران میں ایک کامیاب عوامی بغاوت ہونے والی ہے۔ انہوں نے اپنے اس دعوے کی بنیاد ایران کی سڑکوں پر نظر آنے والے جشن کے مناظر اور امریکہ کے شہروں نیویارک اور لاس اینجلس میں جلاوطن ایرانیوں کے بڑے حمایتی مظاہروں کو بنایا ہے۔

ڈونلڈ ٹرمپ کا کہنا تھا کہ یہ تبدیلی اب ہو کر رہے گی اور وہ دیکھ رہے ہیں کہ حالات اسی سمت میں جا رہے ہیں۔ انہوں نے خاص طور پر لاس اینجلس اور دیگر مقامات پر مقیم ایرانیوں کی خوشی کا حوالہ دیتے ہوئے کہا کہ لوگ اس نئی صورتحال سے بہت پرامید ہیں۔

صدر ٹرمپ نے مزید کہا کہ وہ اب تک ایرانی عوام کی جانب سے سامنے آنے والے ردعمل سے مکمل طور پر مطمئن ہیں۔

اگرچہ انہوں نے اس بات کا اعتراف کیا کہ ایران میں اس وقت صورتحال انتہائی خطرناک ہے اور انہوں نے تمام شہریوں کو اپنی جگہوں پر محفوظ رہنے کی ہدایت بھی کی ہے۔

ان کا کہنا تھا کہ ایک طرف لوگ سڑکوں پر خوشی کے نعرے لگا رہے ہیں تو دوسری طرف بڑے پیمانے پر بمباری بھی ہو رہی ہے، جس کی وجہ سے خطرات بہت زیادہ بڑھ چکے ہیں۔

صدر ٹرمپ کے مطابق وہ صورتحال پر گہری نظر رکھے ہوئے ہیں اور انہیں یقین ہے کہ ایرانی عوام جلد ایک نئے دور کا آغاز کریں گے۔