دو ہفتوں کی جنگ کے بعد امریکا دنیا سے روسی تیل خریدنے کی بھیک مانگ رہا ہے؛ ایرانی وزیرخارجہ

تہران: ایران کے وزیر خارجہ عباس عراقچی نے امریکا پر شدید تنقید کرتے ہوئے کہا ہے کہ واشنگٹن کی روسی تیل کے معاملے پر پالیسی مکمل طور پر متضاد اور دوغلی ثابت ہوئی ہے۔

عباس عراقچی نے اپنے بیان میں کہا کہ امریکا کئی مہینوں تک بھارت کو روس سے تیل کی درآمدات ختم کرنے کے لیے دھمکیاں دیتا رہا۔ تاہم ایران کے ساتھ صرف دو ہفتوں کی جنگ کے بعد وائٹ ہاؤس نے اپنا مؤقف بدل لیا ہے۔

ایرانی وزیر خارجہ کے مطابق اب صورتحال یہ ہے کہ امریکا دنیا کے مختلف ممالک سے درخواستیں کر رہا ہے کہ وہ روسی خام تیل خریدیں تاکہ عالمی توانائی منڈی میں توازن برقرار رکھا جا سکے۔

انہوں نے کہا کہ اس پالیسی تبدیلی نے امریکی حکمت عملی پر کئی سوالات کھڑے کر دیے ہیں جبکہ واشنگٹن کے حالیہ اقدامات سے ظاہر ہوتا ہے کہ اس کی خارجہ پالیسی مستقل مزاجی سے محروم ہے۔

عباس عراقچی نے یورپی ممالک کے کردار پر بھی تنقید کرتے ہوئے کہا کہ یورپ کو امید تھی کہ ایران کے خلاف جنگ کی حمایت کے بدلے اسے امریکا کی مکمل پشت پناہی حاصل ہو جائے گی۔