معیشت سے متعلق اہم خبر؛ پاکستان نے 500 ملین ڈالر یوروبانڈ کی بروقت ادائیگی کردی

پاکستان نے 30 ستمبر 2025 کو میچور ہونے والے 10 سالہ یوروبانڈ کی بروقت ادائیگی کرتے ہوئے 500 ملین ڈالر کی رقم ادا کر دی ہے۔

 مشیر خزانہ خرم شہزاد کا کہنا ہے کہ قرضوں کی بروقت ادائیگی پاکستان کے مالی نظم و ضبط کا مظہر ہے جس سے ملک کی لیکویڈیٹی میں بہتری آئی ہے۔ انہوں نے بتایا کہ عالمی اداروں نے پاکستان کی خودمختار کریڈٹ ریٹنگ میں بہتری کی ہے جس سے سرمایہ کاروں کا اعتماد بڑھ رہا ہے اور یوروبانڈز پریمیئم پر ٹریڈ ہو رہے ہیں۔

 خرم شہزاد کے مطابق کُل قرض کا جی ڈی پی تناسب 77 فیصد سے کم ہو کر 70 فیصد تک آ گیا ہے جبکہ سرکاری قرض میں بیرونی قرض کا حصہ بھی 38 فیصد سے کم ہو کر 32 فیصد رہ گیا ہے۔

مالی سال 2025 میں قرض کی بڑھوتری کی رفتار میں نمایاں کمی دیکھی گئی ہے اور عالمی سطح پر قرض لینے کی لاگت میں کمی سے پاکستان کو مستقبل میں فائدہ حاصل ہوگا۔