حکومت نے عام تعطیل کا اعلان کردیا

پاکستان بھر میں 5 فروری کو یومِ یکجہتی کشمیر منایا جائے گا، جس کے موقع پر کشمیری عوام کی بھارتی تسلط کے خلاف جاری جدوجہد اور عظیم قربانیوں کو خراجِ تحسین پیش کیا جائے گا۔

حکومت نے اس دن کو ملک بھر میں عام تعطیل قرار دیا ہے تاکہ تمام شہری اس موقع پر کشمیری عوام کے ساتھ یکجہتی کا مظاہرہ کر سکیں۔ یومِ یکجہتی کشمیر کے موقع پر مختلف شہروں میں ریلیاں، واکس، سیمینارز اور خصوصی دعائیہ تقریبات کا اہتمام کیا جائے گا۔

اس کے علاوہ انسانی زنجیریں بنا کر قومی یکجہتی کا عملی اظہار بھی کیا جائے گا۔ حکومت نے ریاستی اداروں اور میڈیا کو ہدایت دی ہے کہ وہ مسئلہ کشمیر کو بھرپور انداز میں اجاگر کریں اور قومی و بین الاقوامی سطح پر اس کے حوالے سے آگاہی بڑھائیں۔

ٹیلی ویژن اور ریڈیو پر بھی خصوصی پروگرام نشر کیے جائیں گے جن میں کشمیر کے تاریخی پس منظر، بھارتی مظالم اور موجودہ صورتحال پر تفصیلی روشنی ڈالی جائے گی۔ اس دن کی تقریبات کو پُرامن اور محفوظ بنانے کے لیے بڑے شہروں میں سیکیورٹی کے سخت انتظامات کیے جائیں گے اور قانون نافذ کرنے والے ادارے ریلیوں اور اجتماعات کے دوران مکمل طور پر الرٹ رہیں گے۔

سیاسی اور مذہبی رہنما اس موقع پر تقریبات سے خطاب کریں گے اور زور دیں گے کہ مسئلہ کشمیر کو اقوامِ متحدہ کی سلامتی کونسل کی قراردادوں کے مطابق حل کرنا ناگزیر ہے۔