انٹرنیٹ بندش کے بعد ایک اور تشویشناک خبر آگئی

پاکستان کی نیشنل کمپیوٹر ایمرجنسی ریسپانس ٹیم (National CERT) نے کاروباری اداروں کے لیے خطرے کی گھنٹی بجا دی ہے۔

نیشنل کمپیوٹر ایمرجنسی ریسپانس ٹیم کی جانب سے جاری کردہ نئی ایڈوائزری میں کہا گیا ہے کہ ایس اے پی نیٹ ویور سسٹم میں خطرناک سیکیورٹی خامیوں کی نشاندہی ہوئی ہے، جو ہیکرز کو سسٹمز تک غیر مجاز رسائی فراہم کر سکتی ہیں۔

ایس اے پی نیٹ ویور ایک ایسا پلیٹ فارم ہے جو دنیا بھر کی کمپنیوں میں کاروباری اپلیکیشنز چلانے کے لیے استعمال ہوتا ہے۔ لیکن حالیہ تکنیکی جانچ میں اس میں سنگین نوعیت کی کئی خامیاں دریافت ہوئی ہیں، جن سے نہ صرف ڈیٹا چوری کا خطرہ بڑھ گیا ہے بلکہ سسٹمز پر مکمل کنٹرول بھی ہیکرز حاصل کر سکتے ہیں۔

لاگ ان کے بغیر سسٹم تک رسائی

ایڈوائزری کے مطابق ہیکرز ان خامیوں کا فائدہ اٹھا کر لاگ ان کیے بغیر بھی کمانڈز چلا سکتے ہیں۔ اس کے علاوہ وہ غیرمحفوظ فائلز اپ لوڈ کر سکتے ہیں اور تصدیقی مراحل (Authentication) کو بائی پاس بھی کر سکتے ہیں۔ اگر فوری اقدامات نہ کیے گئے تو کمپنیوں کے مکمل آئی ٹی سسٹمز متاثر ہو سکتے ہیں۔

نیشنل سرٹ کی اہم ہدایات

نیشنل سرٹ نے اداروں کو ہدایت کی ہے کہ وہ فوراً اپنے ایس اے پی نیٹ ویور سسٹمز میں تازہ ترین سیکیورٹی پیچز (updates) انسٹال کریں۔ ساتھ ہی ساتھ متاثرہ ماڈیولز تک نیٹ ورک رسائی محدود کرنے کا مشورہ بھی دیا گیا ہے تاکہ حملہ آور اندر تک نہ پہنچ سکیں۔

اداروں کو سسٹم لاگز پر کڑی نظر رکھنے کی ہدایت کی گئی ہے۔ مشکوک سرگرمیوں کی صورت میں فوری ردعمل دینا ضروری ہے۔ حساس ڈیٹا کی حفاظت کو ترجیحی بنیادوں پر یقینی بنانے پر زور دیا گیا ہے۔

سائبر سیکیورٹی کو سنجیدہ لیں

ماہرین کے مطابق اگر وقت پر سیکیورٹی پیچز نہ لگائے گئے تو سسٹم مکمل طور پر ہیکرز کے کنٹرول میں جا سکتا ہے۔ کاروباری اداروں اور آئی ٹی ٹیموں کو چاہیے کہ وہ سسٹمز کی مسلسل نگرانی جاری رکھیں اور تمام سرورز پر حفاظتی اقدامات کو اپڈیٹ کریں۔