واٹس ایپ صارفین کیلئے اہم خبر

واٹس ایپ اپنے صارفین کیلئے نئے فیچرز متعارف کروانے کے لیے ایک اختیاری پریمیم سبسکرپشن پلان پر کام کر رہا ہے۔

 اس نئے پلان کے تحت صارفین کو واٹس ایپ کے عام ورژن کے مقابلے میں اضافی سہولیات حاصل ہوں گی۔ کمپنی نے واضح کیا ہے کہ یہ سبسکرپشن مکمل طور پر اختیاری ہوگا اور صارفین اپنی مرضی سے اس کا انتخاب کر سکیں گے۔

واٹس ایپ بیٹا برائے اینڈرائیڈ 2.26.4.8 کے مطابق پریمیم سبسکرپشن میں خصوصی اسٹیکرز، ایپ تھیمز، تین سے زیادہ چیٹس پن کرنے کی سہولت، ایپ آئیکن کسٹمائزیشن اور نئے چیٹ رنگ ٹونز شامل کیے جا سکتے ہیں۔ یہ ابتدائی فیچرز ہیں اور صارفین کی رائے کی بنیاد پر مزید سہولیات بھی شامل کی جا سکتی ہیں۔

واٹس ایپ میٹا اے آئی کے لیے ایک نیا تھنکنگ موڈ بھی تیار کر رہا ہے۔ یہ موڈ گہرے تجزیے اور پیچیدہ سوالات کے بہتر جوابات دینے کے لیے ڈیزائن کیا گیا ہے۔ اس میں جواب تیار کرنے میں زیادہ وقت لگے گا، جبکہ فاسٹ موڈ تیز اور سادہ جوابات کے لیے دستیاب رہے گا۔ مستقبل میں صارفین اپنی ضرورت کے مطابق موڈ منتخب کر سکیں گے۔

اینڈرائیڈ صارفین کے لیے واٹس ایپ چینل ایڈمنز کو اسٹیٹس اپڈیٹس شیئر کرنے کی سہولت بھی دی جا رہی ہے۔ اس فیچر کے ذریعے ایڈمنز تصاویر، ویڈیوز اور وائس میسجز چینل میں شیئر کر سکیں گے، جو 24 گھنٹے بعد خود بخود ختم ہو جائیں گے۔

واٹس ایپ اینڈرائیڈ پر حالیہ چیٹ سرچز دکھانے کا فیچر بھی متعارف کروا رہا ہے۔ اس کے علاوہ چینل ایڈمنز دیکھ سکیں گے کہ ان کی اپڈیٹس کتنی بار فارورڈ ہوئیں، لیکن یہ معلومات فالوورز کو نظر نہیں آئیں گی۔

واٹس ایپ نے اینڈرائیڈ اور آئی او ایس صارفین کے لیے سخت اکاؤنٹ سیکیورٹی سیٹنگز بھی متعارف کر دی ہیں، جو ایک ہی ٹوگل کے ذریعے فعال کی جا سکتی ہیں۔ میڈیا فائلز کے تحفظ کے لیے رسٹ پروگرامنگ لینگویج کا استعمال بھی شروع کیا جا رہا ہے۔ کمپنی کے مطابق یہ فیچرز مختلف مراحل میں ہیں اور آنے والے دنوں میں مزید اپڈیٹس متوقع ہیں۔