ڈیپ فیک ویڈیوز کی پہچان کیسے کریں؟ پی ٹی اے نے آسان طریقہ بتا دیا

پاکستان ٹیلی کمیونیکیشن اتھارٹی (PTA) نے عوام کو ڈیپ فیک ویڈیوز کے بڑھتے ہوئے خطرے سے بچانے کے لیے نئی اور اہم ہدایات جاری کی ہیں۔

پاکستان ٹیلی کمیونیکیشن اتھارٹی کے مطابق ڈیپ فیک ٹیکنالوجی کا غلط استعمال کر کے جعلی ویڈیوز بنائی جا رہی ہیں۔ ان ویڈیوز کے ذریعے لوگوں کی عزت، رازداری اور ساکھ کو نقصان پہنچایا جا سکتا ہے۔

پی ٹی اے کا کہنا ہے کہ عوام کو چاہیے کہ وہ کسی بھی ویڈیو پر یقین کرنے سے پہلے اس کی مکمل جانچ کریں۔ اس مقصد کے لیے ویڈیو کے کچھ خاص پہلوؤں پر غور کیا جا سکتا ہے۔ مثلاً اگر کسی ویڈیو میں آنکھوں کی حرکت غیر فطری لگے، چہرے کے تاثرات درست نہ ہوں، آواز اور لبوں کی حرکت میں ہم آہنگی نہ ہو، یا چہرے کی حرکات عجیب لگیں، تو یہ ویڈیو ڈیپ فیک ہو سکتی ہے۔

اتھارٹی نے مشورہ دیا ہے کہ مشکوک ویڈیوز کی تصدیق کے لیے آن لائن دستیاب مستند ٹولز کا استعمال کیا جائے۔ ایسے کئی آن لائن پلیٹ فارمز موجود ہیں جو ویڈیو کے اصلی یا جعلی ہونے کا پتا چلانے میں مدد دیتے ہیں۔

پی ٹی اے نے عوام سے اپیل کی ہے کہ وہ کسی بھی مشتبہ ویڈیو کو بغیر تصدیق کے ہرگز شیئر نہ کریں۔ اگر کسی کو کسی ویڈیو پر شک ہو تو فوراً متعلقہ ادارے کو اطلاع دی جائے۔ اس طرح غلط معلومات کے پھیلاؤ کو روکا جا سکتا ہے۔

اتھارٹی نے کہا کہ ڈیپ فیک مواد صرف سوشل میڈیا پر گمراہ کن معلومات پھیلانے کا ذریعہ نہیں بلکہ یہ قانونی اور سماجی سطح پر بھی خطرناک نتائج پیدا کر سکتا ہے۔ اس لیے ڈیجیٹل دور میں ہر فرد کو محتاط اور باخبر رہنا چاہیے۔

ماہرین کا کہنا ہے کہ ڈیپ فیک کے ذریعے جعلی خبریں، جھوٹے بیانات، اور جعلی چہرے بنا کر نہ صرف فرد بلکہ اداروں کو بھی نشانہ بنایا جا رہا ہے۔ اگر بروقت احتیاط نہ کی گئی تو یہ مسئلہ قومی سطح پر بحران کی شکل اختیار کر سکتا ہے۔