ایندھن کی قیمتوں میں کمی سے ٹرانسپورٹ کرایوں میں کمی

لاہور: پیٹرولیم مصنوعات کی قیمتوں میں کمی کے بعد پنجاب بھر میں ٹرانسپورٹ کرایوں میں 30 سے 70 روپے تک کمی ہوگئی۔

تفصیلات کے مطابق صوبائی وزیر اطلاعات عظمیٰ بخاری نے اس اقدام کی تصدیق کرتے ہوئے وزیر اعلیٰ مریم نواز اور ان کی ٹیم کو ایندھن کی قیمتوں میں کمی کو یقینی بنانے کا سہرا دیا۔

عظمیٰ بخاری نے کہا کہ پنجاب واحد صوبہ ہے جہاں ایندھن کی قیمتوں میں کمی پر ٹرانسپورٹ کے کرایوں میں کمی کی جاتی ہے اور مسافروں کو اضافی چارجز واپس کیے جاتے ہیں۔ پنجاب کی طرح ایندھن کی قیمتوں میں کمی کے بعد کسی دوسرے صوبے نے کرایوں میں کمی پر عمل درآمد نہیں کیا۔

انکا کہنا تھا کہ وزیر اعلیٰ مریم نواز کی ہدایت پر صوبے بھر میں کرایوں میں کمی کا فوری نفاذ کر دیا گیا ہے۔ ضلعی انتظامیہ کی ٹیمیں تمام بس ٹرمینلز پر کرایوں کے شیڈول کی سرگرمی سے جانچ کر رہی ہیں۔

انہوں نے اس بات پر زور دیا کہ زیادہ کرایہ وصول کرنے والے ٹرانسپورٹرز کے خلاف سخت کارروائی کی جائے گی۔ یہ یقینی بنانا ہماری ذمہ داری ہے کہ پٹرول اور ڈیزل کی کم قیمتوں کا فائدہ مسافروں تک پہنچے۔

وفاقی وزیر نے ٹرانسپورٹرز پر زور دیا کہ وہ حکومت کے ساتھ تعاون کریں، مریم نواز ذاتی طور پر صورتحال کی نگرانی کر رہی ہیں تاکہ کرایوں میں کمی پر عمل درآمد کو یقینی بنایا جا سکے۔

خیال رہے کہ 2 روز قبل وفاقی حکومت نے ایندھن کی قیمتوں میں کمی کا اعلان کیا تھا جس کے بعد پیٹرول کی قیمت 10 روپے فی لیٹر کم ہوکر 259.10 روپے سے کم ہو کر 249.10 روپے ہو گئی تھی۔

ہائی اسپیڈ ڈیزل کی قیمت میں بھی 13 روپے 06 پیسے فی لیٹر کمی ہوئی ہے جس کے بعد اس کی قیمت 262 روپے 75 پیسے سے کم ہو کر 249 روپے 69 پیسے فی لیٹر ہوگئی ہے۔