غزہ میں ہر گھنٹے ایک بچہ شہید ہو رہا ہے، اقوام متحدہ کا انکشاف

جنگی جنون میں مبتلا اسرائیل کی غزہ میں وحشیانہ بمباری کے نتیجے میں ہزاروں فلسطینی بچے شہید ہوچکے ہیں۔

یہ اعداد و شمار نہیں بلکہ یہ وہ زندگیاں ہیں جو صیہونی حکومت نے نسل کشی اور ناپاک عزائم سے مختصر کر دی ہیں،  بچوں کو قتل کرنے کا جواز پیش نہیں کیا جا سکتا۔

اقوام متحدہ ریلیف اور ورک ایجنسی برائے فلسطین (یو این آر ڈبلیو اے)، جس کی فلسطین کے مقبوضہ علاقوں میں سرگرمیوں پر اسرائیلی حکومت نے پابندی عائد کر رکھی ہے، نے اپنے ایکس اکاؤنٹ پر ایک پیغام میں لکھا کہ جو بچے بچ جاتے ہیں وہ جسمانی اور جذباتی طور پر زخمی ہوتے ہیں۔

یو این آر ڈبلیو اے نے کہا کہ تعلیم سے محروم، غزہ میں لڑکے اور لڑکیاں ملبے میں پھنسے ہوئے ہیں، ان بچوں کے لیے گھڑی چل رہی ہے،  وہ اپنی جانیں، اپنا مستقبل اور زیادہ تر اپنی امیدیں کھو رہے ہیں۔

امریکی اخبار دی گارڈین کی ایک رپورٹ کے مطابق غزہ کے خلاف اسرائیلی جارحیت کے آغاز سے اب تک شہید ہونے والے فلسطینی بچوں کی تعداد 14,500 ہوگئی ہے۔

رپورٹ میں کہا گیا کہ دسمبر 2024 کے اوائل میں غزہ میں صیہونی افواج کے فضائی حملوں میں شہید فلسطینیوں کی تعداد 44 ہزار سے تجاوز کر گئی ہے۔

ادھر اقوام متحدہ کے انسانی حقوق کے دفتر نے اندازہ لگایا کہ اس وقت فلسطین میں تصدیق شدہ شہادتوں میں 44 فیصد بچے شامل ہیں۔