جنوبی افریقا کیخلاف ٹیسٹ، بابر اعظم قومی اسکواڈ کا حصہ ہونگے؟

پاکستان کرکٹ ٹیم کی انتظامیہ اور سلیکشن کمیٹی نے جنوبی افریقا کے خلاف 26 دسمبر سے سنچورین کے سپر اسپورٹ پارک میں شروع ہونے والے پہلے ٹیسٹ کے لیے سابق کپتان بابر اعظم کو ٹیم کا حصہ بنانے کی درخواست کی ہے۔

واضح رہے کہ دائیں ہاتھ کے بلے باز مسلسل خراب فارم کی وجہ سے رواں سال اکتوبر سے ٹیسٹ اسکواڈ سے غیر حاضر ہیں۔ ملتان میں انگلینڈ کے خلاف پہلے ٹیسٹ کے بعد انہیں اگلے دو ٹیسٹ میچوں کے لیے ٹیم میں شامل نہیں کیا گیا تھا۔

اب ٹیم مینجمنٹ نے جنوبی افریقا کے خلاف پہلے ٹیسٹ کے لیے بابر اعظم کو ٹیم میں شامل کرنے کا فیصلہ کیا ہے جو ٹیسٹ کرکٹ میں 4 ہزار رنز مکمل کرنے سے صرف 3 رنز پیچھے ہیں۔

جنوبی افریقا کے خلاف تینوں ون ڈے میچز میں ڈک پر آؤٹ ہونے والے اوپنر عبداللہ شفیق کو ٹیسٹ اسکواڈ سے باہر کردیا گیا ہے۔ ذرائع کا کہنا ہے کہ کپتان شان مسعود صائم ایوب کے ساتھ اننگز کا آغاز کریں گے۔

38 ٹیسٹ کپتان شان مسعود اس وقت ٹیم میں تیسرے نمبر پر بیٹنگ کر رہے ہیں۔ تاہم اننگز کا آغاز کرنا ان کے لیے کوئی نیا تجربہ نہیں ہوگا کیونکہ انہوں نے اپنے ٹیسٹ کیریئر کا آغاز بطور اوپنر کیا تھا۔

دوسری جانب جنوبی افریقا کے خلاف تین ون ڈے میچوں میں دو نصف سنچریوں کی مدد سے 148 رنز بنانے والے بابر اعظم ٹیم سے ڈراپ ہونے کے بعد ٹیسٹ کرکٹ میں واپسی کر رہے ہیں۔

بابر اعظم نے 55 ٹیسٹ میچوں میں 54.46 کی اوسط سے 3997 رنز بنائے ہیں جس میں 9 سنچریاں بھی شامل ہیں۔

تاہم دسمبر 2022 میں کراچی میں نیوزی لینڈ کے خلاف 161 رنز کی اننگز کے بعد سے انہیں مشکلات کا سامنا کرنا پڑا، انہوں نے 18 اننگز میں صرف 366 رنز بنائے اور کوئی نصف سنچری اسکور نہیں کی۔