آسٹریلوی میڈیا نے ویرات کوہلی کو ‘جوکر’ قرار دے دیا

آسٹریلوی میڈیا نے باکسنگ ڈے ٹیسٹ کے پہلے روز ڈیبیو کرنے والے اوپنر سیم کونسٹاس سے تلخ کلامی کرنے پر ویرات کوہلی کو جوکر کہنا شروع کردیا۔

گزشتہ روز میلبورن میں کھیلے جا رہے سیریز کے چوتھے ٹیسٹ میچ کے پہلے روز ویرات کوہلی کا ڈیبیو کرنے والے آسٹریلوی اوپنر سیم کونسٹاس سے جھگڑا ہو گیا تھا۔

ٹیسٹ کے آغاز پر 19 سالہ آسٹریلوی اوپنر سیم کونسٹاس نے غیر معمولی بیٹنگ کرتے ہوئے بھارتی بولر جسپریت بمراہ کے خلاف جارحانہ بیٹنگ کی جس پر بھارتی فیلڈرز پریشان نظر آئے۔

میچ کے 10 ویں اوور کے اختتام پر ویرات کوہلی اور سیم کونسٹاس کے کندھے ٹکرا گئے جس کا اعادہ دونوں کے درمیان ہوا تاہم عثمان خواجہ اور امپائر نے مداخلت کرکے دونوں کا بیچ بچاؤ کرایا۔

اس واقعے کے بعد ویرات کوہلی کو تنبیہ کی گئی اور میچ فیس کا صرف 20 فیصد جرمانہ عائد کیا گیا اور ایک ڈی میرٹ پوائنٹ دیا گیا۔

اس واقعے کے سوشل میڈیا پر وائرل ہونے کے بعد ویرات کوہلی پر کم از کم ایک میچ کی پابندی عائد کرنے کا مطالبہ کیا جا رہا ہے۔

آسٹریلوی میڈیا نے جمعہ کی صبح کے اخبارات میں کوہلی کو ‘جوکر’ قرار دیا جب کہ ایک تصویر میں بچے کے منہ میں فیڈر بھی دیکھا گیا۔

دی ویسٹ آسٹریلیا نامی اخبار نے ‘کوہلی دی جوکر’ کی سرخی شائع کی جس پر بھارتی حامی اور مداح برہم ہوگئے۔

دوسری جانب پوسٹ ڈے پریس کانفرنس میں سیم کونسٹاس نے ویرات کوہلی کے ٹکرانے کو غلطی قرار دیتے ہوئے کہا کہ وہ اپنے دستانے ایڈجسٹ کر رہے تھے اور لگتا ہے کہ ویرات نے غلطی سے انہیں کندھا مارا۔