کیا صائم ایوب چیمپئنز ٹرافی سے باہر ہوجائیں گے؟

پاکستان کرکٹ ٹیم کے ابھرتے ہوئے اسٹار صائم ایوب جنوبی افریقا کے خلاف دوسرے ٹیسٹ میچ کے پہلے روز دائیں ٹخنے میں فریکچر کی وجہ سے چھ ہفتوں کے لیے مسابقتی کرکٹ سے باہر ہوگئے۔

انجری کی وجہ سے بائیں ہاتھ کے اوپنر کی 19 فروری سے 9 مارچ تک ہونے والی آئی سی سی چیمپئنز ٹرافی 2025 میں شرکت پر خدشات پیدا ہوگئے ہیں۔

تمام فارمیٹس میں شاندار فارم میں رہنے والے صائم ایوب فیلڈنگ کر رہے تھے جب ان کے دائیں ٹخنے میں چوٹ آئی جس کے بعد ان کا فوری طبی معائنہ کیا گیا۔

اسی دن کیے گئے ایم آر آئی میں فریکچر کی تصدیق ہوئی، جسے ٹخنے کے میڈیکل مون بوٹ میں منتقل کیا گیا ہے۔ ٹیسٹ میچ سے باہر ہونے کے باوجود صائم ایوب ٹیم کے ساتھ رہیں گے اور میچ ختم ہونے کے بعد ٹیم کے ساتھ پاکستان واپس جائیں گے۔

اگرچہ انجری کی مکمل حد کی تصدیق ہونا ابھی باقی ہے لیکن صائم ایوب کی موجودہ ٹیسٹ سیریز سے غیر موجودگی پاکستان کی امیدوں پر ایک دھچکا ہے۔

یہ انجری ویسٹ انڈیز کے خلاف دو ٹیسٹ میچوں کی سیریز، جنوبی افریقا اور نیوزی لینڈ کے خلاف سہ ملکی ون ڈے سیریز اور فروری 2024 میں متوقع چیمپیئنز ٹرافی سے قبل ہوئی ہے۔

گزشتہ ایک سال کے دوران صائم ایوب کی شاندار فارم نے ان کی انجری کو پاکستان کے لیے تشویش کا باعث بنا دیا ہے۔

آسٹریلیا کے وائٹ بال دورے کے بعد سے 22 سالہ بلے باز قومی ٹیم کا اہم حصہ رہے ہیں، انہوں نے ون ڈے میں تین سنچریاں اور ایک نصف سنچری اسکور کی جبکہ ٹی ٹوئنٹی میں 98 رنز کی ناقابل شکست اننگز کھیلی۔

چیمپیئنز ٹرافی قریب آنے کے ساتھ ہی پاکستان کے سلیکٹرز اور شائقین صائم ایوب کی صحت یابی پر گہری نظر رکھے ہوئے ہیں۔