مغربی کنارے میں فائرنگ کے تبادلے میں 3 یہودی آباد کار جہنم واصل

غزہ کی پٹی پر تل ابیب حکومت کی نسل کشی کی جنگ کے آغاز سے مقبوضہ علاقے میں کشیدگی میں اضافے کے بعد مغربی کنارے کے شمالی حصے میں جوابی فائرنگ کی کارروائی میں کم از کم تین اسرائیلی آباد کار ہلاک ہو گئے۔

اسرائیلی میگن ڈیوڈ ادوم (ایم ڈی اے) ایمرجنسی سروس کے سربراہ ایلی بن نے بتایا کہ پیر کے روز قلقیلیہ کے مشرق میں واقع المندوق گاؤں کے قریب ہونے والے حملے میں مزید چھ یہودی زخمی ہوئے۔

اسرائیلی فوج نے ایک بیان میں اعلان کیا ہے کہ فوجی آپریشن کے ذمہ داروں کی تلاش کر رہے ہیں، حملے کے آس پاس رکاوٹیں کھڑی کی گئی ہیں اور متعدد دیہات کو گھیرے میں لے لیا گیا ہے۔

صیہونی فوج نے کہا کہ مسلح افراد نے ایک بس اور متعدد گاڑیوں پر فائرنگ کی، یہ حملہ غیر قانونی کیڈومیم بستی کے قریب کیا گیا تھا۔

ادھر غزہ میں قائم حماس کی مزاحمتی تحریک نے اسرائیل کے زیر قبضہ مغربی کنارے میں فائرنگ کے ‘بہادرانہ’ آپریشن کی تعریف کی ہے۔

حماس نے کہا کہ یہ آپریشن صیہونی دشمن کے جاری جرائم، غزہ میں لوگوں کی نسل کشی، مغربی کنارے کے لوگوں کو بے گھر کرنے کے حکومت کے منصوبوں کے ساتھ ساتھ مسجد اقصیٰ کے احاطے اور دیگر مقدس مقامات کے خلاف غیر قانونی آباد کاروں کی خلاف ورزیوں کا بہادرانہ جواب ہے۔

بیان میں مزید کہا گیا ہے کہ جوابی کارروائیوں سے صہیونی دشمن کو واضح پیغام جاتا ہے کہ مغربی کنارے، غزہ کی پٹی اور مقبوضہ علاقوں میں دیگر جگہوں پر ایسے لوگ موجود ہیں جو اپنے حقوق سے دستبردار نہیں ہوں گے اور یہ مزاحمت اس وقت تک جاری رہے گی جب تک قبضہ مکمل طور پر ختم نہیں ہو جاتا۔